اسلام آباد۔19جون (اے پی پی):وزیراعظم کے معاون خصوصی برائے سیاسی امور رانا ثناء اللہ نے وفاقی وزیر ریلوے محمد حنیف عباسی سے اہم ملاقات کی ۔ ملاقات میں ریلوے کو جدید، محفوظ اور فعال بنانے کے اقدامات پر تفصیلی گفتگو کی گئی۔وزیر ریلوے نے 9 ٹرینیں آؤٹ سورس کرنے اور مزید 11 کی تیاری سے آگاہ کیا، ریلوے سکولز و ہسپتالوں کو بھی آؤٹ سورس کرنے کا فیصلہ کر لیا گیا۔محمد حنیف عباسی نے کہا کہ راولپنڈی ریلوے سٹیشن پر معلوماتی ڈیسک قائم کر دیا گیا ہے،مسافروں کو بروقت اور درست معلومات فراہم کی جا رہی ہیں، آر ڈبلیو ایم سی کے ساتھ معاہدے کے بعد سٹیشنز کی صفائی میں نمایاں بہتری آئی ہے،صفائی کے جدید نظام سے مسافروں کو بہتر ماحول فراہم کیا گیا، بوگیوں کی مرمت، نئی کوچز کی خریداری اور جدید ٹریکنگ سسٹم پر کام جاری ہے،مسافروں کے لئے سہولیات میں خاطر خواہ اضافہ کیا جا رہا ہے۔رانا ثناء اللہ نے اقدامات کو سراہتے ہوئےحکومتی حمایت کا یقین دلایا اور کہا کہ ریلوے کی بہتری کے لئے وزیر اعظم آفس مکمل تعاون جاری رکھے گا۔
