اسلام آباد، 21 جولائی (اے پی پی): نیشنل ہائی ویز اینڈ موٹروے پولیس نے مون سون کے حالیہ سلسلے اور محکمہ موسمیات کی 21 سے 25 جولائی کے دوران مختلف علاقوں میں شدید بارشوں کی پیش گوئی کے پیش نظر ٹریول ایڈوائزری جاری کر دی ہے۔
ترجمان کے مطابق بارشوں کے دوران سڑکیں پھسلن کا شکار ہو جاتی ہیں، جس سے ٹریفک حادثات کا خدشہ بڑھ جاتا ہے۔ شہریوں کو غیر ضروری سفر سے گریز کی ہدایت کی گئی ہے۔ تاہم اگر سفر کرنا ناگزیر ہو تو ڈرائیورز کو رفتار کم رکھنے، اگلی گاڑی سے مناسب فاصلہ برقرار رکھنے، اور گاڑی کی لائٹس و وائپرز کو درست حالت میں رکھنے کا مشورہ دیا گیا ہے۔
مزید کہا گیا ہے کہ دورانِ ڈرائیونگ موبائل فون استعمال نہ کیا جائے اور مکمل توجہ ڈرائیونگ پر مرکوز رکھی جائے۔ پہاڑی علاقوں کی طرف سفر کرنے والے ڈرائیورز اور سیاحوں کو خصوصی احتیاط برتنے کی تلقین کی گئی ہے۔
کسی بھی ایمرجنسی یا مدد کی صورت میں نیشنل ہائی ویز اینڈ موٹروے پولیس کی ہیلپ لائن 130 سے فوری رابطہ کیا جا سکتا ہے۔ ترجمان نے واضح کیا کہ مسافروں کی حفاظت، ہماری اولین ترجیح ہے۔
