اسلام آباد،31 جولائی (اے پی پی): اسپیکر قومی اسمبلی سردار ایاز صادق کی ایرانی ہم منصب ڈاکٹر محمد باقر قالیباف سے ملاقات ہوئی۔ ملاقات جنیوا میں ہونے والی چھٹی عالمی اسپیکرز کانفرنس کی سائیڈ لائن پر ہوئی۔ دونوں اسپیکرز نےدو طرفہ پارلیمانی تعلقات کو مزید مستحکم بنانے پر اتفاق کیا۔
اسپیکر قومی اسمبلی سردار ایاز صا دق نے کہا کہ پاکستان اور ایران کے مابین تاریخی برادرانہ و دوستانہ تعلقات پائے جاتے ہیں۔ پاکستان ایران کی خودمختاری اور سالمیت کی بھرپور حمایت کرتا ہے، مشرق وسطی میں پائیدار امن خطے کی ترقی اور خوشحالی کے لیے ناگزیر ہے۔
سردار ایاز صادق نے کہاکہ ایران پر اسرائیلی حملہ عالمی قوانین کی صریحاً خلاف ورزی ہے،پاکستان تمام عالمی تنازعات کا مذاکرات کے ذریعے پرامن حل کا خواہاں ہے۔ پاکستان ایران کے جوہری پروگرام کا مذکرات کے ذریعے پُرامن حل چاہتا ہے،۔ پاکستان کی پارلیمان نے ایران پر اسرائیلی جارحیت کے خلاف متفقہ قراردادیں منظور کیں۔
ایرانی اسپیکر ڈاکٹر محمد باقر قالیباف نے ایران پر اسرائیلی جارحیت کے خلاف پاکستان کی جانب حمایت پر شکریہ ادا کیا۔ ایران اور پاکستان کے مابین مضبوط برادرانہ اور دوستانہ تعلقات موجود ہیں۔ایران پاکستان کے ساتھ اپنے برادرانہ تعلقات کو قدر کی نگاہ سے دیکھتا،۔ پاکستان کی پارلیمان اور عوام کی جانب سے حمایت کو ایرانی عوام ہمیشہ یاد رکھیں گے۔
