اسلام آباد: 27 اگست ( اے پی پی): وزیرِ اعظم محمد شہباز شریف سے ایشیائی ترقیاتی بینک (ایشین ڈویلپمنٹ بینک/اے ڈی بی) کے صدر مساتو کانڈا نے وفد کے ہمراہ وزیراعظم ہاؤس اسلام آباد میں ملاقات کی اور صدر ایشائی ترقیاتی بینک کو پاکستان آمد پر خوش آمدید کہا۔
پاکستان کے ساتھ ایشیائی ترقیاتی بینک کی دیرینہ شراکت کو سراہتے ہوئے وزیراعظم نے کہا کہ ایشائی ترقیاتی بینک پاکستان کی ترقی و خوشحالی کے سفر میں ہمیشہ ہی ایک قابل اعتماد شراکت دار رہا ہے۔ وزیر اعظم کے کہا کہ یہ امر انتہائی خوش آئند ہے کہ اے ڈی بی پاکستان کے کئی بڑے منصوبوں میں شراکت داری میں دلچسپی رکھتا ہے جو کہ پاکستان کی معاشی جہت میں انقلابی ثابت ہوں گے۔ انہوں نے کہا ریلوے ، پبلک ٹرانسپورٹ اور معدنیات کے شعبوں میں پاکستان اور اے ڈی بی شراکت داری کو آگے لے جاسکتے ہیں جو کہ پاکستان کی معیشت کے لئے انتہائی مفید ثابت ہوگا۔
وزیراعظم نے اے ڈی بی کے وفد کو حکومت پاکستان کی جانب سے متعارف کرائی گئی اصلاحات سے آگاہ کیا جن میں ٹیکس محصولات میں اضافہ، توانائی کے شعبے کی اصلاحات، مالی استحکام کو بہتر بنانا، موسمیاتی تبدیلی کے تباہ کن اثرات کے خلاف اقدامات، غیر ہدف شدہ سبسڈی میں کمی اور سماجی تحفظ کو بڑھانا شامل ہیں۔
صدر ایشیائی ترقیاتی بینک نے اظہارِ خیال کرتے ہوئے ایشیائی ترقیاتی بینک کے ساتھ پاکستان کے ایک بانی ممبر کی حیثیت سے طویل وابستگی کو سراہا۔ انہوں نے جامع اصلاحات کرنے پر حکومت پاکستان کی تعریف کی اور پاکستان کے لیے بینک کی مسلسل حمایت کے عزم کا اعادہ کیا۔ انہوں نے پاکستان میں انفراسٹرکچر کی ترقی، ماحولیاتی تبدیلی کے شعبے اور ادارہ جاتی اصلاحات میں تعاون بڑھانے کی بینک کے عزم کی تجدید کی۔
ملاقات میں وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب ، وفاقی وزیر پاور ڈویژن سردار اویس احمد لغاری، وفاقی وزیر ریلوے حنیف عباسی، وزیر مملکت برائے خزانہ و ریلوے بلال اظہر کیانی اور متعلقہ اعلیٰ سرکاری افسران بھی موجود تھے۔
