اسلام آباد، 20 جنوری ( اے پی پی): وفاقی وزیرِ دفاع خواجہ محمد آصف سے وفاقی جمہوریۂ ایران کے سفیر ڈاکٹر رضا امیری نے ملاقات کی ہے۔
ملاقات خوشگوار اور تعمیری ماحول میں منعقد ہوئی، جو پاکستان اور ایران کے درمیان دیرینہ برادرانہ تعلقات کی عکاس تھی۔ ملاقات کے دوران دونوں فریقین نے گرمجوشی سے خیرسگالی کے جذبات کا تبادلہ کیا اور باہمی احترام، مشترکہ اقدار اور قریبی عوامی روابط کی بنیاد پر دوطرفہ تعلقات کو مزید مستحکم کرنے کے عزم کا اعادہ کیا۔
وزیرِ دفاع نے اس بات پر زور دیا کہ پاکستان اور پاکستانی عوام ایران کے ساتھ گہرے، تاریخی اور برادرانہ تعلقات رکھتے ہیں اور مشکل حالات میں ایرانی عوام کے ساتھ کھڑے ہیں۔
پاکستان کو ایرانی عوام اور قیادت کی دانشمندی پر مکمل اعتماد ہے، جو ان کی شاندار ثقافت، قدیم تہذیب، تاریخ اور استقامت سے ماخوذ ہے، اور جو ایران کو درپیش تمام چیلنجز سے نمٹنے کی صلاحیت رکھتی ہے۔
ایرانی سفیر نے حکومتِ پاکستان اور پاکستانی عوام کا شکریہ ادا کیا۔ انہوں نے پاکستانی قیادت اور قوم کی جانب سے حمایت کو سراہا اور ایران کے حوالے سے پاکستان کے اصولی اور دیرینہ مؤقف کا اعتراف کیا۔
