اسلام آباد،30 جولائی(اے پی پی): وزیراعظم محمد شہباز شریف کے پاکستان کو برآمدات پر مبنی اور صنعتی طور پر مسابقتی معیشت بنانے کے وژن کے مطابق وزیراعظم کے معاونِ خصوصی برائے صنعت و پیداوار، ہارون اختر خان، نے ایم جی جے ڈبلیو آٹوموبائل پاکستان اور بنگلہ دیش کی رینکون گروپ کے درمیان بنگلہ دیش کو گاڑیوں کی برآمد کے لیے مفاہمتی یادداشت (ایم او یو) پر دستخط کی تقریب میں شرکت کی۔
یہ معاہدہ پاکستان کی آٹوموٹیو صنعت کے لیے ایک اہم سنگِ میل ہے اور ملک کی مینوفیکچرنگ صلاحیتوں پر بڑھتے ہوئے عالمی اعتماد کی عکاسی کرتا ہے۔ معاہدے کے تحت ایم جی جے ڈبلیو آٹوموبائل پاکستان رواں سال بنگلہ دیش کو مقامی طور پر تیار کی گئی 100 گاڑیاں برآمد کرے گا، جبکہ آئندہ چار برسوں میں مجموعی طور پر 5,800 گاڑیوں کی برآمد کا ہدف مقرر کیا گیا ہے۔
تقریب کے بعد میڈیا سے گفتگو کرتے ہوئے ہارون اختر خان نے کہا کہ اس معاہدے سے پاکستان کو لاکھوں ڈالر کا قیمتی زرمبادلہ حاصل ہوگا اور یہ حکومت کے برآمدات پر مبنی صنعتی ترقی کے ایجنڈے کی جانب ایک اہم پیش رفت ہے۔انہوں نے کہا کہ وزیراعظم محمد شہباز شریف کی قیادت میں حکومت ایسی پالیسیوں پر عمل پیرا ہے جو برآمدات کے فروغ، مقامی مینوفیکچرنگ کے استحکام، سرمایہ کاری کے حصول اور صنعتوں کے لیے کاروبار دوست ماحول کی فراہمی کو یقینی بناتی ہیں۔
انہوں نے مزید کہا کہ حکومت ایک جامع آٹو پالیسی کو حتمی شکل دے رہی ہے جس کا مقصد گاڑیوں کی برآمدات میں اضافہ، مقامی صنعت کے فروغ اور پاکستان کی آٹوموٹیو مینوفیکچرنگ بنیاد کو مزید مضبوط بنانا ہے۔معاونِ خصوصی نے کہا کہ پاکستان کی آٹوموٹیو صنعت نے معیار، مقامی پیداوار اور پیداواری صلاحیت کے میدان میں نمایاں ترقی کی ہے، جس کے باعث پاکستان میں تیار ہونے والی گاڑیاں عالمی منڈیوں میں کامیابی سے مقابلہ کرنے کی صلاحیت رکھتی ہیں۔
انہوں نے اس عزم کا اعادہ کیا کہ حکومت ان تمام صنعتوں کی بھرپور معاونت جاری رکھے گی جو برآمدات، روزگار کے مواقع اور جدید ٹیکنالوجی کے فروغ میں کردار ادا کر رہی ہیں۔اس موقع پر رینکون گروپ کے ایگزیکٹو ڈائریکٹر، محمد مصطفیٰ الرشید بھوئیاں نے کہا کہ یہ معاہدہ بنگلہ دیش کی آٹوموبائل مارکیٹ میں صحت مند مسابقت کو فروغ دے گا اور صارفین کو پاکستان میں تیار ہونے والی اعلیٰ معیار کی گاڑیاں دستیاب ہوں گی۔
انہوں نے کہا کہ پاکستان کی آٹوموٹیو صنعت بین الاقوامی مینوفیکچرنگ معیار پر پورا اترتی ہے اور برآمدات کے وسیع امکانات رکھتی ہے۔ایم جی جے ڈبلیو آٹوموبائل پاکستان کے چیف ایگزیکٹو آفیسر، جیان چیانگ شاؤ نے اس شراکت داری کا خیرمقدم کرتے ہوئے پاکستان سے علاقائی اور بین الاقوامی منڈیوں میں گاڑیوں کی برآمدات بڑھانے کے عزم کا اعادہ کیا۔
تقریب میں ایم جی جے ڈبلیو آٹوموبائل پاکستان کے چیف آپریٹنگ آفیسر عامر نذیر، اعلیٰ سرکاری حکام، دونوں کمپنیوں کے نمائندگان اور کاروباری برادری کے ارکان نے بھی شرکت کی۔
حکومتِ پاکستان وزیراعظم کے وژن کے مطابق صنعتی ترقی، برآمدات میں اضافے اور پاکستان کو خطے کا ایک اہم مینوفیکچرنگ ہب بنانے کے لیے اپنے عزم پر قائم ہے۔
