اسلام آباد، 7 اکتوبر ( اے پی پی): وزیراعظم محمد شہباز شریف نے کہا ہے کہ آزاد جموں و کشمیر اور گلگت بلتستان کی ترقی اور وہاں کی عوام کی خوشحالی حکومت کی ترجیحات میں شامل ہے۔
ان خیالات کا اظہار انہوں نے وفاقی وزیر امور کشمیر و گلگت بلتستان انجینئر امیر مقام سے ملاقات کے دوران گفتگو کرتے ہوئے کیا، ملاقات میں آزاد جموں و کشمیر اور گلگت بلتستان اور خیبر پختونخوا سے متعلق امور پر تبادلہ خیال کیا گیا۔
وزیراعظم کا کہنا تھا کہ خیبر پختونخوا میں بڑھتی ہوئی دہشت گردی کو ہر قیمت پر روکنا ہوگا۔ ہماری خواہش ہے کہ خیبر پختونخوا میں بھی ملک کے دیگر حصوں کی طرح ترقی ہو۔
انہوں نے کہا کہ خیبر پختونخوا کی عوام کی دھشت گردی کے خلاف قربانیوں کو قدر کی نگاہ سے دیکھتے ہیں۔
وفاقی وزیر نے وزیراعظم کو آزاد جموں و کشمیر اور گلگت بلتستان میں جاری امور اور پیش رفت کے حوالے سے بریفنگ دی۔
وزیراعظم نے آزاد جموں و کشمیر اور گلگت بلتستان کے عوام کی فلاح و بہبود، ترقی اور بنیادی سہولیات کی فراہمی کو یقینی بنانے کے لیے مؤثر اقدامات جاری رکھنے کی ہدایت کی۔
