اسلام آباد، 05نومبر (اے پی پی): پاکستا ن ا ور جرمنی کے درمیان جمعرات کے روز وزارتِ اقتصادی امور، اسلام آباد میں ترقیاتی تعاون سے متعلق 2026–2027 کا پاک جرمن ڈائیلاگ کامیابی سے مکمل ہوگیاہے۔
جرمن وفد کی قیادت وفاقی وزارتِ اقتصادی تعاون و ترقی کے ڈپٹی ڈائریکٹر جنرل برائے ایشیا و لاطینی امریکہ کرسٹوف راؤہ نے کی۔ جرمنی کی پاکستان میں سفیر، اینا لیپل بھی وفد میں شامل تھیں۔ پاکستانی وفد کی قیادت وزارتِ اقتصادی امور کے سیکریٹری محمد حمیر کریم نے کی۔
جرمن وفد نے اسلام آباد میں مختلف منصوبوں کا دورہ بھی کیا تاکہ زمینی سطح پر جرمن تعاون کے اثرات کا جائزہ لیا جا سکے۔ اس کے علاوہ، 4 نومبر کو پہلا ’’جرمن پاکستانی بزنس ڈائیلاگ‘‘ منعقد ہوا، جس کا مقصد نجی شعبے اور ترقیاتی تعاون کے درمیان روابط اور ہم آہنگی کو مزید مضبوط بنانا تھا۔
مذاکرات میں دوطرفہ مالی اور تکنیکی تعاون کے منصوبوں پر توجہ دی گئی۔ ان میں دو ترجیحی شعبے شامل تھے: موسمیاتی تبدیلی اور توانائی، بشمول سماجی تحفظ کے لیے حالات کے مطابق حکمتِ عملی؛ اور پائیدار معاشی ترقی اور ہنرمندی کا فروغ۔ اجلاس کے اہم نتائج میں دونوں فریقوں کی جانب سے ایک پروٹوکول پر دستخط بھی شامل تھے، جس میں ان شعبوں میں تعاون کے مخصوص اہداف پر اتفاق کیا گیا۔
کرسٹوف راؤہ نے پائیدار ترقی کے اہداف کے لیے پاکستان کے عزم کو سراہا اور پاکستان کے قومی اقتصادی تبدیلی کے منصوبے اور ’’اڑان پاکستان‘‘ اقدام کے لیے BMZ کی معاونت کو اجاگر کیا۔
سیکریٹری محمد حمیر کریم نے پاکستان کے ترقیاتی ایجنڈے کے لیے جرمن حکومت کی مسلسل معاونت کو سراہا اور دونوں ملکوں کی دیرینہ شراکت داری کی بنیاد بننے والی مشترکہ اقدار پر اظہارِ تشکر کیا۔
اجلاس کے اختتام پر دونوں فریقوں نے گزشتہ کئی دہائیوں میں ہونے والی نمایاں پیش رفت کا اعتراف کیا اور کہا کہ جرمن ترقیاتی تعاون کے عملی ثمرات آج بھی دونوں ملکوں کے لیے فائدہ مند ہیں۔ اس اسٹریٹجک ڈائیلاگ نے نئے وعدوں سے متعلق مذاکرات کے لیے باضابطہ بنیاد فراہم کی ہے۔ یہ مذاکرات 2027 میں جرمنی کے شہر برلن میں ہوں گے۔
