کونیا ،03جنوری(اے پی پی):وزیراعظم عمران خان ترک صدر رجب طیب اردوان کی دعوت پر وفد کے ہمراہ دو روزہ سرکاری دورے پر ترکی پہنچ گئے ہیں۔
ترکی کے شہر کونیا پہنچنے پر گورنر کونیا ، ڈپٹی میئر کونیا، ترکی میں پاکستان کے سفیر اور پاکستانی سفارتخانے کے سینئر حکام نے وزیر اعظم پاکستان عمران خان کا پر تپاک استقبال کیا۔
وزیر اعظم پاکستان عمران خان وفد کے ہمراہ مولانا جلال الدین رومی کے مزار پر حاضری دیں گے اور ترک صدر رجب طیب اردگان سے خصوصی ملاقات کریں گے۔ملاقات میں دونوں ممالک کے مابین دوطرفہ تعلقات کے تمام پہلووں سمیت علاقائی اور بین الاقوامی صورتحال سے متعلقہ امور پرتبادلہ خیال کیا جائے گا۔ وزیراعظم انقرہ میں اپنے قیام کے دوران تاجر برادری سے بھی خطاب بھی کرینگے۔
وزیرخارجہ شاہ محمود قریشی، وزیر خزانہ اسد عمر اور منصوبہ بندی کے وزیر، مخدوم خسرو بختیار، مشیر وزیراعظم برائے صنعت و تجارت عبدالرزاق داؤد بھی وزیراعظم کے ہمراہ ہیں۔
اس دورے سے دونوں ملکوں کے درمیان تعلقات مزید مستحکم خصوصاً اقتصادی اور تجارتی شعبوں میں تعاون کے نئے مواقع تلاش کرنے میں مدد ملے گی۔
اے پی پی /ظہیر/حامد
سورس:وی این ایس کونیا
