اسلام آباد، 29 جنوری (اے پی پی): جی ایس پی پلس کے بارے میں اعلیٰ سطح کا اجلاس وزیراعظم عمران خان کی زیر صدارت منعقد ہوا ۔اجلاس میں وزیر اعظم نے ملک کے تمام حصوں سے جبری مشقت کے مکمل خاتمہ کو یقینی بنانے کیلئے اقدامات اٹھائے جائیں اور ادارہ شماریات بچوں سے مشقت کے بارے میں ملک گیر سروے کا اہتمام کرے۔
وزیراعظم نے انسانی حقوق کے تحفظ اور اقلیتوں و کمزور طبقات کے حقوق کے فروغ کے عزم کا اظہار بھی کیا اور ہدایات جاری کیں کہ کلبوں (اسلام آباد کلب، جمخانہ وغیرہ) اور دیگر عوامی مقامات پر گھریلو خادماﺅں، آیاﺅں اور گھریلو ملازمین کی آزادانہ نقل و حرکت کو محدود کرنے والے تمام امتیازی سائن بورڈز فوری طور پر ہٹا دیئے جائیں۔
وزیر اعظم عمران خان نے ادارہ شماریات کو ہدایت کی کہ بچوں سے مشقت کے بارے میں ملک گیر سروے کرے اور بعد ازاں ایسے بچوں کو غربت سے نکالنے اور ان کی تعلیم کیلئے اقدامات اٹھانے کے بارے میں جامع حکمت عملی وضع کرے۔ پاکستان ضابطہ فوجداری میں ضروری ترامیم متعارف کرا کر جبری لاپتہ معاملہ کو قابل تعزیر ٹھہرایا جا رہا ہے۔
وزیر انسانی حقوق شیریں مزاری، وزیر اطلاعات چوہدری فواد حسین، وزیر مملکت داخلہ شہریار خان آفریدی، مشیر تجارت عبدالرزاق داﺅد اور سینئر حکام نے شرکت کی۔
اے پی پی/ عمار برلاس/شاہ زیب
وی این ایس اسلام آباد
