اسلام اباد، 25 جنوری (اے پی پی): پاک بحریہ کے سربراہ کی اُردن میں اُردن کی رائل نیول فورس اور رائل ایئر فورس کے سربراہان سے ملاقات ،جس میں باہمی دلچسپی کے اُمور بشمول دفاعی وبحری اشتراک پر تبادلہ خیال کیا گیا۔ترجمان پاک بحریہ کے مطابق سربراہ پاک بحریہ نے دہشت گردی کے خلاف جنگ میں پاکستان کے عزم اور کردار ، انسدادِدہشت گردی اور بحری قزاقی کی بیخ کنی میں پاک بحریہ کی کاوشوں پر روشنی ڈالی۔ سربراہ پاک بحریہ نے پاکستان نیوی کی میزبانی میں فروری 2019کومنعقد ہونے والی کثیرالملکی میری ٹائم” مشق امن” 2019 کی اہمیت کو بھی اُجاگر کیا۔ٍ
ایڈمرل ظفر محمود عباسی نے بحری امن و استحکام کے لئے پاک بحریہ کی جانب سے ریجنل میری ٹائم سکیورٹی پٹرول کے اقدام سے آگاہ کیااور تکنیکی افرادی قوت وپیشہ ورانہ مہارتوں کی فراہمی اور تربیت کے مختلف شعبوں میں دو طرفہ تعاون پر بھی بات چیت کی۔
اُردن کی رائل نیول فورس اور رائل ایئر فورس کے سربراہان نے خطے میں میری ٹائم سکیورٹی کے قیام میں پاک بحریہ کے کردار کو بھی سراہا۔
اے پی پی/حمزہ / قراۃالعین
وی این ایس، اردن
