اسلام آباد، 04فروری(اے پی پی ):وزیر اعظم عمران خان نےسیاخت کے فروغ کیلئےنیشنل ٹورازم کوارڈینیشن بورڈ کی منظوری دے دی ہے۔
وزیرِ اعظم عمران خان کی زیرِ صدارت ٹورازم ٹاسک فورس کا اجلاس ہوا،جس میں وزیر اعظم عمران خان نے سیاحت کے فروغ ، صوبوں اور وفاق کے درمیان رابطوں کو فروغ دینے ، صوبائی حکومت کے تعاون سے صوبوں میں سیاحت کے حوالے سے ریگولٹری فریم ورک تشکیل دینے اوربین الاقوامی سطح پر ملکی سیاحت کو اجاگر کرنے جیسے اہم مقاصد کے لئے نیشنل ٹورازم کوارڈینیشن بورڈ کی تشکیل دینے کی منظوری دی۔پچیس ممبران پر مشتمل نیشنل ٹورازم کوارڈینیشن بورڈ وفاقی وزارتوں، صوبائی محکموں اور نجی شعبے کے ٹورازم انڈسٹری سے وابستہ افراد پر مشتمل ہوگا۔
اجلاس میں پی ٹی ڈی سی کی تنظیم نو کا فیصلہ بھی کیا گیا،پی ٹی ڈی سی کی دو سو ارب کی جائیدادیں صوبوں کو منتقل کر دی جائیں گی جبکہ پی ٹی ڈی سی نیشنل ٹورازم کوارڈینیشن بورڈ کے لئے سیکرٹریٹ کا کام سرانجام دے گا۔
اجلاس میں مذہبی ٹورازم، ایڈونچر ٹورازم، کلچرل، تاریخی اور آرکیالوجیکل ٹورازم، ایکو ٹورازم، ٹرانس ہمالیہ جیپ ریلی گروپ، انفراسٹرکچر اور سہولت کاری، ریگولیٹری اور پالیسی ریفارمز، سرمایہ کاری اور ٹورازم برینڈنگ کے لئے مخصوص ورکنگ گروپ بنانے کا بھی فیصلہ کیا گیا۔
اجلاس میں وزیرِ اعظم کو ٹورازم کے حوالے سے اب تک ہونے والی پیش رفت پر بریفنگ دیتے ہوئے کہا گیا کہ خیبر پختونخواہ میں بیس نئے سیاحتی مقامات بنانے کا عمل جاری ہے، بالاحصار قلعے کو سیاحتی سرگرمیوں کا مرکز بنایا جارہا ہے جبکہ پنجاب میں واقع 800اور خیبر پختونخواہ میں واقع 157ریسٹ ہاؤسز کے کمرشل استعمال کے لئے انتظامات کو حتمی شکل دی جائے ،ایکو ٹورازم پر خصوصی توجہ دی جا رہی ہے۔
اجلاس میں وزیرِ اطلاعات چوہدری فواد حسین، وزیر برائے بین الصوبائی رابطہ ڈاکٹر فہمیدہ مرزا، معاون خصوصی افتخار درانی، ذوالفقار بخاری، صوبائی وزرا اور ٹاسک فورس کے اراکین شریک تھے۔
اے پی پی /حمزہ/حامد
وی این ایس اسلام آباد
