اسلام آباد ، 21 جون ( اے پی پی ): وزیر خارجہ شاہ محمود قریشی نے کہا ہے کہ اقوام متحدہ کی جانب سے اسلام آباد کو دوبارہ “فیملی اسٹیشن”کے طور پر بحال کرنا بین الاقوامی اداروں کا پاکستان پر اعتماد کا اظہار ہے جس کے بہت مثبت اثرات برآمد ہونگے۔
اسلام آباد میں میڈیا سے گفتگو کرتے ہوئے وزیر خارجہ کا کہنا تھا کہ پاکستان کی سیکورٹی ایجنسیز اور دفتر خارجہ کو مبارکباد پیش کرتا ہوں اور اقوام متحدہ کے اس اقدام کا خیر مقدم کرتا ہوں ، مجھے امید ہے کہ اس فیصلے سے اعتماد سازی کے ساتھ ساتھ سرمایہ کاری کو فروغ ملے گا ۔انہوں نے کہا کہ ہماری کوشش ہونی چاہیے کہ ہم سرمایہ کاری کو اور دو طرفہ تجارت کو بڑھائیں ۔ انہوں نے کہا کہ ویزہ لبرلائزیشن سے مجھے قوی امید ہے کہ اقتصادی نقل و حرکت میں بھی بہتری پیدا ہو گی۔
وزیرخارجہ نے کہا کہ 2008 میں اسلام آباد میریٹ ہوٹل میں بم دھماکے کے بعداقوام متحدہ نے سیکورٹی کی صورتحال کو نامناسب سمجھتے ہوئے اسلام آباد کو “نان فیملی اسٹیشن” قرار دیا تھا اور یہ سلسلہ دس سال جوں کا توں رہا۔اس دوران دفتر خارجہ اقوام متحدہ کے ساتھ مسلسل رابطے میں رہا،جیسے ہی سیکورٹی صورتحال کو سنبھالنے اور دہشت گردی کو شکست دینے میں ہمیں کامیابی حاصل ہوئی تو وزارتِ خارجہ نے اقوام متحدہ اور ان کی ایجنسیز پر زور دیا کہ اب سیکورٹی کی صورتحال بہتر ہو چکی ہے لہذا اب اقوام متحدہ کو اپنے فیصلے پر نظر ثانی کرنی چاہیے۔
انھوں نے کہا کہ اقوام متحدہ نے اپنے طور پر جامع تحقیق کی اور ہمارے تجزیے سے اتفاق کرتے ہوئے کہ اب اسلام آباد کو دوبارہ بذریعہ نوٹیفکیشن فیملی اسٹیشن ڈیکلیئر کر دیا گیا ہے۔
وی این ایس ، اسلام آباد
