پشاور، 28 دسمبر (اے پی پی): وزیر اعظم عمران خان نے کہا ہے کہ قبائلی علاقوں کے انضمام کا اصل مقصد وہاں کی عوام کو ملک کے دیگر علاقوں کی طرز پر سہولیات فراہم کرنا ہے، انضمام شدہ علاقوں میں نوجوانوں کے لئے روزگار کے مواقع فراہم کرنا حکومت کی اولین ترجیحات میں شامل ہے۔
ان خیالات کا اظہار وزیر اعظم عمران خان نے ہفتہ کو یہاں پشاور دورے کے موقع پر خیبر پختونخوا کی صوبائی کابینہ کے اراکین سے ملاقات کے دوران کیا۔ وزیر اعظم نے کہاکہ موجودہ حکومت نے انضمام شدہ علاقوں کے لئے ریکارڈ فنڈز مہیا کئے ہیں، انہوں نے ہدایت کی کہ قبائلی علاقہ جات میں کاروبار کے مواقع بڑھانے پر توجہ دیں کیونکہ اس سے علاقے میں روزگار کے مواقع پیدا ہوں گے جبکہ سماجی و معاشی ترقی بھی ہوگی۔
خیبر پختونخوا کی صوبائی کابینہ کے اراکین سے گفتگو کرتے ہوئے وزیر اعظم نے آگاہ کیا کہ سعودی عرب نے سیاحت کے شعبے میں سرمایہ کاری میں دلچسپی کا اظہار کیا ہے۔انہوں نے ہدایت کی کہ خیبر پختونخوا حکومت اس پہلو پر خصوصی توجہ دے تاکہ صوبے میں موجود سیاحت کے استعداد کو برؤے کار لایا جا سکے۔
ملاقات میں گورنر خیبر پختونخواشاہ فرمان، وزیر اعلی محمود خان، چیف سیکرٹری، آئی جی پولیس اورسینئر افسران بھی موجود تھے۔
وی این ایس ، پشاور
