لاہور،5 دسمبر(اے پی پی ):صدر مملکت ڈاکٹر عارف علوی نے کہا ہے کہ پاکستان کے بارے میں بننے والا غلط تاثر وطن عزیزکوایک مخلص اور ایماندار قیادت میسر ہونے کی وجہ سے زائل ہو رہا ہے، پاکستان ایک بڑی ابھرتی ہوئی مارکیٹ ہے اور یہاں سرمایہ کاری کے وسیع مواقع موجودہیں اور بہتر سکیورٹی صورتحال کے باعث سرمایہ کاروں کےلئے محفوظ مقام بن چکا ہے۔ وہ جمعرات کے روز الحمراءہال میں ایڈ ایشیاءکانفرنس لاہور 2019ءسے خطاب کر رہے تھے۔ اس موقع پر کانفرنس کی آرگنائزنگ کمیٹی کے چیئرمین سرمد علی،چیئرمین پاکستان ایڈورٹائزنگ ایسوسی ایشن وقار حیدری،اعزازی چیئرمین جاوید جبار سمیت عہدیداران اور غیر ملکی وفود بھی موجود تھے۔
صدر مملکت نے کہا کہ آج کے دور میں مختلف قسم کے ذرائع ابلاغ کام کر رہے ہیں، میڈیا پر دی جانیوالی معلومات بعض اوقات درست نہیں ہوتیں،آج کل زیادہ تر اخبارات خبروں کی بجائے آراءپر مبنی ہیں،اشتہارات میں درست معلومات اورسچائی ہونی چاہئے۔ انہوں نے کہا کہ 1970ء1980ءکی ایڈورٹائزنگ کااب کی ایڈورٹائزنگ سے تقابلی جائزہ لیں تو بہت فرق ہے ، میڈیا ایک طرح سے معاشرے کا آئینہ بھی ہوتا ہے،آج کے دور میں ایڈورٹائزنگ رابطوں کا مجموعہ ہے،اب دنیا ممکنات کو دیکھتی ہے جو حقیقت کے قریب تر ہوتی ہیں اور یہ ایڈورٹائزنگ سے ہی ممکن ہے ۔
صدر مملکت نے کہا کہ ایڈورٹائزنگ کا شعبہ دراصل مصنوعات کی اہمیت کو اجاگر کرتا ہے، اخبارات کی خبریں چوبیس گھنٹے تاخیر سے ہم تک پہنچتی ہیں جبکہ ٹی وی کی خبریں بھی بعض اوقات دوگھنٹے تک لیٹ ہوتی ہیں لیکن ڈیجیٹل میڈیا پر خبریں مسلسل چل رہی ہوتی ہیں اور ان پر ایڈیٹوریل کنٹرول نہیں ہوتا۔
صدر مملکت نے کہا کہ ایڈورٹائزنگ کی اہمیت اس وجہ سے بھی ہے کہ اس میں تخلیق کاری،سکلز اور آئیڈیاز ہوتے ہیں۔ انہوں نے کہا کہ ایڈورٹائزنگ اس وقت ضرورت بن چکی ہے لیکن اس میں سچائی ہونی چاہئے ،انہوں نے کہاکہ اخبارات بھی اس وقت اپنی پروڈکٹ بیچ رہے ہیں اوریہ بھی فرق کرنا مشکل ہو گیا ہے کہ نیوز اورایڈورٹائزنگ میں کیا فرق ہے،اسی طرح انٹرٹینمنٹ انڈسٹری میں بھی ایسا ہی ہو رہا ہے کیونکہ فلم میں بھی ایڈورٹائزنگ پربہت زیادہ فوکس ہوتا ہے۔
صدر مملکت نے غیر ملکی وفود کی پاکستان آمد کا خیر مقدم کیا اور کہا کہ امید ہے کہ وہ لاہور کی ثقافت سے لطف اندوز ہوں گے،برطانوی شہزادہ ولیم اور شہزادی کیٹ،ہالینڈ کی ملکہ میکسیما نے حالیہ لاہور کے دورہ پر اپنے تاثرات میں اسے خوبصورت اور تاریخی شہر قرار دیا، صدر مملکت نے امید ظاہر کی کہ غیر ملکی وفود جب اپنے اپنے ملکوں کو واپس جائیں گے تو یہ پاکستان کے سفیر بن کر جائیں گے،انہوں نے کانفرنس کے کامیاب انعقاد پر منتظمین کو مبارکباد پیش کی اور اسے ایڈورٹائزنگ کے شعبہ کی ترقی کیلئے انتہائی اہم قراردیا اور کہا کہ اس طرح کی کانفرنسز کے انعقاد سے ایک دوسرے کے تجربات سے استفادہ کرنے میں مدد ملتی ہے،چیئرمین آرگنائزنگ کمےٹی ایڈ ایشیاءلاہور سرمد علی نے کہا کہ 1989ءمیں لاہور میں ایڈ ایشیاءکانفرنس منعقد ہوئی جس کے 30 سال بعد دوبارہ لاہور میں اس کانفرنس کا انعقاد کیا گیا،انہوں نے امید ظاہر کی کہ کانفرنس کے پاکستان میں انعقاد سے ایڈورٹائزنگ کے شعبہ کو تقویت ملے گی،کانفرنس سے جاوید جبار سمیت دیگر مقررین نے بھی خطاب کیا۔
اے پی پی /ڈیسک/حامد
