اسلام آباد ، 02 جنوری (اے پی پی ): وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ اوورسیز پاکستانی ہمارا اثاثہ ہیں جنہوں نے ہمیشہ ملک سے محبت کا اظہار کیا ہے اور ملک کی تعمیر و ترقی میں مثبت اور اہم کردار ادا کیا ہے۔ قو می سلامتی سمیت تمام اہم ریاستی اداروں کا تحفظ ہماری ذمہ داری ہے۔ وزیراعظم کی ترجیح ہے کہ ملک میں کاروبار کرنے کے طریقہ کار کو سہل بنایا جائے،رواں سال امید اور ترقی کا سال ہے۔
جمعرات کو نجی کمپنی کی جانب سے کیب سروس کے افتتاح کے موقع پر میڈیا سے بات کرتے ہوئے ڈاکٹر فردوس عاشق اعوان کا کہنا تھا وزیراعظم عمران خان کی قیادت میں پاکستان کا خطے اور عالمی سطح پر مثبت تشخص اجاگر ہوا اور آج پاکستان سرمایہ کاری کے لیے ایک محفوظ اور آئیڈیل منزل کی حیثیت رکھتا ہے۔
معاون خصوصی نے اسلام آباد میں کیب سروس کے آغاز کو خوش آئند قرار دیتے ہوئے کہا کہ نوجوانوں کو روزگار کی فراہمی ہماری اولین ترجیح ہے اور اس طرح کے کاروبار کے مواقع کے ذریعے نوجوان نسل کوروزگار فراہم کیا جائے گا۔انہوں نے کہا کہ نوجوان ہمارا قیمتی اثاثہ ہیں جنہیں طاقتور بنا رہے۔ امید ہے اپوزیشن جماعتیں قومی سلامتی کے مسئلے پر اتحاد کا مظاہرہ کرینگی اور پارلیمنٹ کے ذریعے قومی سلامتی سے جڑے مسئلے کا مستقل آئینی حل پیش کریگی ۔
وی این ایس، اسلام آباد
