اسلام آباد ، 03 جنوری(اے پی پی ): وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ وزیر اعظم نے ملکی معیشت کی بہتری اور تعمیر و ترقی کے لیے استحکام کو ضروری قرار دیا ہے ،انہوں نے کہا ہے کہ معاشی میدان میں گزشتہ سال ہونے والی کامیابیوں کو مزید مستحکم بنانے پر بھرپور توجہ دی جا رہی ہے۔
سماجی رابطے کی ویب سائٹ ٹویٹر پر اپنے پیغام میں معاون خصوصی کا کہنا تھا کہ وزیر اعظم عمران خان کی زیر صدارت پاکستان تحریک انصاف اور اتحادی جماعتوں کی پارلیمانی پارٹی کا اجلاس ہوا جس میں اٹارنی جنرل نے پارلیمانی پارٹی کو پارلیمنٹ میں متعارف کرائی جانے والی قانونی ترمیم پر تفصیلی بریفنگ دی گئی۔اجلاس میں پاکستان تحریک انصاف اور اتحادی جماعتوں کے اراکین نے وزیر اعظم کی قیادت ،عوام کی فلاح اور ملک کی بہتری کے لیے اٹھائے جانے والے اقدامات پر بھرپور اعتماد کا اظہار کیا۔
ڈاکٹر فردوس عاشق اعوان نے اپنے ٹویٹ میں بتایا کہ وزیراعظم عمران خان نے ممبران کو ہدایت کی کہ وہ عوام کو زیادہ سے زیادہ ٹائم دیں اور اپنی بھرپور توجہ عوام کے مسائل کے حل پر صرف کریں۔ وزیراعظم نے شرکاء کو نئے سال کی مبارکباد دی اور دعا کی کہ 2020 ملک اور عوام کے لیے بہتر سال ثابت ہو۔
سورس : وی این ایس ، اسلام آباد
