ملتان، 4 مئ ( اے پی پی)：پوری دنیا میں 4مئی بین الاقوامی طور پر فائر فائٹر ڈے کے طور پر منایا جاتا ہے۔ ڈائریکٹر جنرل پنجاب ایمرجنسی سروس ریسکیو 1122ڈاکٹر رضوان نصیر کی ہدایت پر ملتان میں فائر فائٹرز کے عالمی دن کے موقع پر فیلگ مارچ اور ریلی کا انعقاد کیا گیا۔ سنٹرل اسٹیشن ریسکیو1122 ملتان پر ڈسٹرکٹ ایمرجنسی آفیسر ڈاکٹر ناطق حیات غلزئی نے تفصیل بتاتے ہو کہا کہ پاکستان میں بھی فائر فائٹر ڈے پورے جوش جذبے سے منایا جاتا ہے۔انہوں نے کہا کہ ریسکیو1122ملتان نے فائر فائٹر ڈے کے حوالے سے چوک کمہاراں والہ سے کلمہ چوک تک فلیگ مارچ کیا جس میں فائر فائٹرز کی خدمات پر روشنی ڈالی جو اپنی زندگی خطرے میں ڈال کر لوگوں کی جان اور مال کی حفاظت کرتے ہیں گکھڑ پلازہ میں شہید ہونے والے فائر فائٹر کو خراج تحسین پیش کیا۔ اِس موقع پر انچارج آپریشنل اینڈ ایڈمن ڈاکٹر کلیم اللہ، ایمر جنسی آفیسر ڈاکٹرخالد محمود اور ریسکیو اینڈ سیفٹی آفیسر محمد ارشد خان موجود تھے
انچارج آپریشن اینڈایڈمن ڈاکٹر کلیم اللہ نے کہا کہ فائر فائٹر ڈے منانے کا مقصد فائر فائٹرزکی قربانیوں کو خراج تحسین پیش کر نا ہے فائر فائٹرز اپنی زندگیاں خطرے میں ڈال کر لوگوں کے جان ومال کا تحفظ کرتے ہیں فائر فائٹر ہمارے ماتھے کا جھومر ہیں انکی بدولت لوگو ں میں احساس تحفظ پیدا ہواہے کرونا احتیاطی تدابیر کے پیش نظر ہم نے آج فائر فائٹر ڈے کو صرف فلیگ مارچ تک ہی محدود رکھا ہے۔
انہوں نے مزیدکہا کہ گذشتہ سال ریسکیو1122ملتان نے 843آگ لگنے کے واقعات میں آگ بجھائی جبکہ تحصیل شجاع آباد میں 46 مقامات پر آگ لگی جس پر 1122نے موقع پر پہنچ کر آگ پر قابو پایا اِن آگ لگنے کے حادثات میں 53لوگ ایسے تھے جو آگ لگنے میں جھلس گئے آگ لگنے کی بڑی وجہ لاپرواہی رہی۔889آگ لگنے کے واقعات میں 207کی وجہ لاپرواہی تھی اِس لیئے آگ لگنے کے واقعا ت میں کمی لانے کیلئے لازمی ہے ہر فرد احساس ذمہ داری کے ساتھ جاری کردہ حفاظتی اقداما ت اور احتیاطی تدابیر پر عمل کرے تاکہ آگ لگنے کے واقعات میں کمی لائی جاسکے۔
ڈسٹرکٹ ایمرجنسی آفیسرریسکیو1122ملتان ڈاکٹر ناطق حیات غلزئی نے کہا کہ فائر فائٹر اپنی جانوں کی بازی لگا کر لوگوں کی مال وجان کی حفاظت کرتے ہیں اُن کو خراج تحسین پیش کرنے کا بہترین طریقہ یہ ہے کہ ہم آتشزدگی کے واقعات نہ ہونے دیں اور مندرجہ ذیل حفاظتی اقداما ت اور احتیاطی تدابیر پر عمل پیرا ہوں تاکہ آگ لگنے کے حادثات میں کمی لائی جاسکے۔
بجلی کی وائرنگ معیاری کیبل سے کروائیں گھروں، مارکیٹوں اور فیکٹریوں میں معیاری سرکٹ بریکر اور ارتھ لگوائیں۔رات کو دُکانیں بند کرتے ہوئے UPS احتیاطً بند کر دیں، ہمیشہ معیاری UPSلگوائیں۔ ڈھیلی تاروں ناقص پلگوں اور ساکٹوں کی علامات کا پتہ لگائیے مثلاً جلنے کے نشان، گھٹتی بڑھتی روشنی اور سپارک کی آواز وغیرہ اور خراب ہونے کی صورت میں فوراً تبدیل کروائیں۔گندم کی فصل کاٹنے کے بعد باقیات کو آگ مت لگائیں۔ خواتین کچن میں کھانا پکاتے ہوئے ڈھیلے ڈھالے کپڑوں کے استعمال سے گریز کریں اور ہمیشہ ایپرن استعمال کریں۔ رات کو سونے سے پہلے گیس کے مین والو بند کر دیں۔
آخرمیں انہوں نے کہا کہ عوام محفوظ اور صحت مند معاشرے کی تشکیل میں ریسکیو 1122کا ساتھ دیں اور شہریوں کو چاہیے کہ وہ بیسک لائف سپورٹ او ر آگ بجھانے کی تربیت حاصل کریں تاکہ محفوظ معاشرے کا قیام عمل میں لایا جاسکے۔
سورس： وی این ایس ، ملتان
