لاہور، 6 جون (اے پی پی): سینئر وزیر پنجاب عبدالعلیم خان کی زیر صدارت کرونا پر قائم کابینہ کمیٹی کا اجلاس ہوا، اجلاس میں چیف سیکرٹری اور سیکرٹری صحت نے صوبے میں کرونا کی موجودہ صورتحال پر بریفنگ دی۔
اجلاس میں گفتگو کرتے ہوئے عبدالعلیم خان نے کہا کہ پہلے مرحلے میں پنجاب میں ڈریپ سے منظور شدہ ایک ہزار انجیکشن خریدنے کا فیصلہ کیا ہے۔انہوں نے کہا کہ انسانی جان کی کوئی قیمت نہیں،حکومت تمام وسائل بروئے کار لائے گی۔انہوں نے تمام پبلک مقامات پر ایس او پیز پر سختی سے عمل درآمد کو یقینی بنانے کی ہدایت کی ۔
عبدالعلیم خان نے کہا کہ ہر شہری کو اب کرونا کی شدت کا احساس ہو چکا، شہری پارکوں میں بچوں کو ساتھ نہ لائیں اور ماسک کا استعمال یقینی بنائیں ۔انہوں نے کہا کہ جہاں خلاف ورزی ہوئی وہاں سخت ترین کارروائی عمل میں لائی جائے گئی۔انہوں نے مزید کہا کہ بازاروں میں طے شدہ اوقات میں ایس او پیز کے ساتھ سرگرمیاں جاری رکھی جائیں۔انہوں نے کہا کہ حفاظتی اصولوں پر عمل کرکہ شہری کرونا پر قابو پانے میں حکومتی کاوشوں کا ساتھ دیں، لاک ڈاؤن میں نرمی کے زیادہ نقصانات سامنے آئے تو دوبارہ سختی کا سوچ سکتے ہیں جبکہ گزشتہ دو دنوں سے خلاف ورزی کرنے والوں کے خلاف سخت مہم جاری ہے۔
اس کے علاوہ سیکرٹری صحت اور دیگر افسران نے صوبے میں کرونا کے مریضوں کے اعداد و شمار سے بھی آگاہ کیا۔
اجلاس میں چیف سیکرٹری اور سیکرٹری صحت سمیت وزیر صحت ڈاکٹر یاسمین راشد،وزیر اطلاعات فیاض الحسن چوہان اور وزیر صنعت میاں اسلم اقبال نے شرکت کی ۔
وی این ایس ، لاہور
