اسلام آباد ، 18 جولائی (اے پی پی ):سیکرٹری پلاننگ مطہر نیاز رانا کی زیرصدارت ترقیاتی منصوبوں اور اس سے متعلقہ معاملات کے معائنے اور نگرانی کا جائزہ اجلاس ہوا ، اجلاس میں ممبر انسپیکشن اینڈ مانیٹرنگ پلاننگ کمیشن ، ممبر سپورٹ سروسز ، وفاقی ادارہ شماریات اور وزارت منصوبہ بندی کے سینئر عہدیداروں نے شرکت کی ۔
ممبر انسپیکشن اینڈ مانیٹرنگ پلاننگ کمیشن کی جانب سے اجلاس کو بتایا گیا کہ انسپکشن اینڈ مانٹرینگ ونگ ترقیاتی منصوبوں کے معائنے ، نگرانی اور اس پر عمل درآمد کے طریقہ کار کے لئے ایکشن پلان پر کام کر رہا ہے ۔
سیکرٹری پلاننگ مطہر نیاز رانا نے کہا کہ پی ایس ڈی پی منصوبوں کی بروقت تکمیل ، مختص لاگت اور اخراجات کو مد نظر رکھنے کے لیے ڈیش بورڈ بنانے کی ضرورت ہے ، ترقیاتی منصوبوں کی اپ ڈیٹس ڈیش بورڈ پر موجود ہونے سے بر وقت فیصلہ کرنے اور کوتاہیوں کو دور کرنے میں مدد ملے گی ۔
وی این ایس، اسلام آباد
