پشین ، 22 اگست(اے پی پی ): ڈسٹرکٹ ہیلتھ آفیسر پشین ڈاکٹر سعید احمد میروانی نے کہا ہے کہ تشنج ایک خطرناک اور جان لیوا مرض ہے جس سے بچاؤ کا واحد حل حفاظتی ٹیکہ جات ہے اس مرض سے ماں اور بچے کی جان کو ہمیشہ خطرہ لاحق ہوتا ہے جس کی وجہ سےپشین سمیت بلوچستان بھر میں اموات کی شرح زیادہ ہے۔
ان خیالات کا اظہار انہوں نے اپنے دفتر میں تشنج بچاؤ آگاہی مہم کے حوالے سے پریس کانفرنس کے دوران کہی، انہوں نے کہاکہ خصوصی مہم کے دوران 15 سال سے 49 سال تک کی شادی شدہ اور غیر شادی شدہ خواتین کو تشنج کے حفاظتی ٹیکے لگائے جائینگے، انہوں نے کہاکہ ضلع پشین کے 43 یونین کونسلوں میں 280 ٹیمیں تشکیل دی گئی ہیں، جو گھر گھر جائیں گی جبکہ 45 فکس سینٹر ہسپتالوں میں بنائے گئے ہیں۔
ڈسٹرکٹ ہیلتھ آفیسر نے کہاکہ اس پروگرام کو کامیاب بنانے کےلیے ایم این اے ، ایم پی ایز ، علماء کرام، سماجی کارکنان اور دیگر مکاتب فکر سے تعلق رکھنے والے افراد وخواتین محکمہ صحت کی ٹیموں کے ساتھ تعاون کریں تاکہ اس جان لیوا مرض سے بچاو ممکن ہوسکے۔
اس موقع پر ڈپٹی ڈسٹرکٹ ہیلتھ آفیسر ڈاکٹر ثناؤاللہ کاکڑ، ڈاکٹر نجیب اللہ مرکزی صدر آل پیرامیڈیکل سٹاف پاکستان فضل محمد کاکڑ، شکرالدین ترین، امین اللہ، نجیب اللہ بٹے زئی ڈاکٹر حیات اللہ، جمعہ خان، مطیع اللہ، اکمل خان، نزیر احمدکاکڑ سمیع اللہ اور دیگر بھی موجود تھے۔
