پشاور، 13ستمبر(اے پی پی): وادی چترال کی خوبصورت وادی بروغل میں تاریخی فیسٹیول کا چترال اپر میں آغاز ہو گیا۔ ڈپٹی کمشنر چترال اپر شاہ سعود نے یاک پولو کے میچ سے فیسٹیول کا افتتاح کیا۔ فیسٹیول میں یاک پولو، گدھا پولو،کرکٹ، فٹبال، بزکشی، میراتھن ریس، رسہ کشی، کشتی سمیت روایتی اور واخئی کھانوں کے سٹالزاور موسیقی کی محفل منعقد کی جائے گی۔
ڈپٹی کمشنر چترال اپر شاہ سعود نے اس موقع پر گفتگو کرتے ہوئے کہا کہ راستے تمام کھل چکے ہیں سیاح کثیر تعداد میں وادی بروغل پہنچ چکے ہیں۔ فیسٹیول میں مختلف کھیلوں کے مقابلے منعقد کئے جارہے ہیں۔ ہماری کوشش ہے کہ سیاحوں کو بہترین سہولیات کی فراہمی کیساتھ ساتھ بہترین تفریح بھی فراہم کریں۔
انہوں نے کہا کہ محکمہ سیاحت خیبرپختونخوا اور ڈسٹرکٹ گورنمنٹ چترال اپر کے زیراہتمام وادی اپر چترال کی خوبصورت وادی بروغل میں شروع ہونے والے فیسٹیول کی اختتامی تقریب آج منعقد ہو گی۔
ڈپٹی کمشنر شاہ سعود نے مزید کہا کہ حکومت کی جانب سے سیاحتی مقامات سے لاک ڈاؤن ہٹانے کے بعد سیاحتی سرگرمیوں کاآغاز کردیا گیا ہے۔ سطح سمندر سے 12460 فٹ بلندی پر واقع بروغل نیشنل پارک میں منعقد ہونے والے فیسٹیول میں سیاحوں کیلئے ٹینٹ ویلیج کا قیام بھی عمل میں لایا گیا ہے تاکہ بروغل پہنچنے والے سیاح فیسٹیول سے محظوظ ہونے کیساتھ ساتھ ایڈونچر ٹورازم سے بھی لطف اندوز ہو سکیں۔
وادی بروغل چترال شہر سے 250 کلومیٹر کے فاصلے پر واقع ہے۔چترال کے سالانہ فیسٹیول اور تہواروں میں شامل بروغل فیسٹیول کو بہترین انداز میں منایا جارہا ہے۔
اس موقع پر محکمہ سیاحت خیبرپختونخوا، پاک فوج، چترال سکاؤٹس،ضلعی انتظامیہ چترال سمیت دیگر عہدیداران بھی موجود تھے۔
