لاہور28،اکتوبر:(اے پی پی): وزیراعلیٰ پنجاب سردار عثمان بزدار کی زیرصدارت اعلیٰ سطح کا اجلاس منعقد کیا گیا۔صوبے میں سموگ سے نمٹنے کیلئے کئے جانے والے اقدامات کا جائزہ لیا گیا۔پنجاب میں الیکٹرک رکشے اورگاڑیاں چلانے کی تجویز پر اتفاق کیا گیا۔ صوبہ بھر میں بائیو گیس پلانٹ لگانے کا فیصلہ کیا گیا۔وزیراعلیٰ عثمان بزدار کی ہدایت پر پی ڈی ایم اے میں سموگ مانیٹرنگ سیل قائم کیا گیا۔ فیکٹریوں میں ٹائر جلانے پر پابندی پر سختی سے عملدرآمد یقینی بنانے کی ہدایت کی گئی۔ 7نومبر سے صوبہ بھر میں روایتی بھٹہ خشت بند کرنے کا فیصلہ کیا گیا۔پی سی ایس آئی آر کو صاف ہوا کی فراہمی کیلئے سموگ ٹاورز تیار کرنے کا جائزہ لینے کی ہدایت بھی کی گئی ہے۔ پنجاب میں 43فیصد سموگ گاڑیوں کی دھوئیں کی وجہ سے پیدا ہورہی ہے۔ ایئر کوالٹی انڈس بڑھنے پر خود بخود اقدامات کیلئے ضلع سطح پر اختیارات تفویض کیے گئے ہیں۔ دو روز میں سموگ پیدا کرنے والے اقدامات پر204ایف آئی آر درج،11685گاڑیوں اور109انڈسٹریز کے چالان کیے گئے۔ عثمان بزدار نے کہا کہ ڈپٹی کمشنروں کو ریلیف کمشنر کے اختیارات تفویض کردیئے گئے ہیں۔ہر ضلع میں سموگ کنٹرول سینٹر قائم کیاگیا ہے۔کمشنرز اورڈپٹی کمشنرزکے دفاتر میں فوکل پرسن مقررکردیاگیا ہے۔ انہوں نے کہا کہ زگ زیگ ٹیکنالوجی سے چلنے والے بھٹہ خشت چلتے رہیں گے۔ سموگ کے خاتمے کو یقینی بنانے کیلئے حکومت اورسول سوسائٹی کا تعاون بے حدضروری ہے۔فصلوں کی باقیات کو جلانے پر پابندی پر سختی سے عملدرآمدکرایا جائے گا۔ وزیر اعلی پنجاب نے کہا کہ سٹیل رولنگ انڈسٹریز کو ماحول دوست ٹیکنالوجی پر منتقل کیا ۔
