اسلام آباد،28 جنوری (اے پی پی ): اردن کی مسلح افواج کے چئرمین جوائنٹ چیفس آف اسٹاف میجر جنرل یوسف الحنیطی نے جمعرات کو نیول ہیڈ کوارٹرز کا دورہ کیا اور امیر البحر ایڈمرل محمد امجد خان نیازی سے ملاقات کی۔
ترجمان پاک بحریہ کے مطابق نیول ہیڈکوارٹرز آمد پر پاک بحریہ کے سربراہ نے معزز مہمان کا استقبال کیا۔ مہمان کو روایتی انداز میں گارڈ آف آنر پیش کیا گیا۔
میجر جنرل یوسف الحنیطی نے نیول ہیڈ کوارٹرز میں یادگار شہداء پر پھول چڑھائے اور ان کا پرنسپل اسٹاف آفیسرز سے تعارف کرایا گیا،اردن کی مسلح افواج کے چئیرمین جوائنٹ چیفس آف اسٹاف نے سربراہ پاک بحریہ سے ملاقات کی جس میں باہمی دلچسپی کے امور اور دو طرفہ تعاون پر تبادلہ خیال کیا گیا۔
معزز مہمان نے خطے میں بحری سیکیورٹی اور استحکام کے حوالے سے پاک بحریہ کی کاوشوں کو سراہا۔ ملاقات میں دونوں ممالک کے درمیان دفاعی تعاون کو مذید مضبوط کرنے کے عزم کا بھی اعادہ کیا گیا۔
