پشاور، 28جنوری(اے پی پی): وفاقی وزیر دفاع پرویز خٹک نے کہا ہے کہ بی آ ر ٹی پشاور بلاشبہ پاکستان کا بہترین اور کامیاب ترین سفری منصوبہ ہے۔ بی آر ٹی پشاور پبلک ٹرانسپورٹ میں اپنی مثال آپ ہے اور اس کا موازنہ کسی بھی بین الاقوامی پبلک ٹرانسپورٹ سسٹم سے کیا جاسکتا ہے۔
ان خیالات کا اظہار انہوں نے بی آر ٹی پشاور کے مرکزی دفتر کے دورہ کے موقع پر کیا۔ اسپیکر قومی اسمبلی اسد قیصر، وفاقی وزیر دفاع پرویز خٹک، وزیر مملکت برائے پارلیمانی امورعلی محمد خان، صوبائی وزیر ٹرانسپورٹ شاہ محمد وزیراور صوبائی وزیر شوکت یوسف زئی بھی اس موقع پر انکے ہمراہ تھے۔
سی ای او ٹرانس پشاور سمیت دیگر حکام نے معزز مہمانوں کا استقبال کیا اور تمام تر آپریشنل امور اور انتظامی ڈھانچے پر تفصیلی بریفنگ دی ۔
اس موقع پر وفاقی وزیر دفاع پرویز خٹک کا کہنا تھا کہ پشاور بی آ ر ٹی منصوبہ بلاشبہ پاکستان کا سب سے بہترین اور کامیاب سفری منصوبہ ہے۔ کرونا وائرس سے ممکنہ بچاؤ اور پھیلاو کے حوالے سے تعلیمی اداروں سمیت دیگر مختلف نجی اداروں کی بندش کے باوجود یومیہ ایک لاکھ 56ہزار سے زائد لوگوں کو بہترین سفری سہولت فراہم کر رہا ہے۔ بی آر ٹی کے آغاز سے اب تک عوام کے پیسوں کو بہت سوچ سمجھ کر اور شفاف انداز میں عوام کے وسیع تر مفاد میں لگایا گیا ہے۔
جلد تعلیمی اداروں کے آغاز اور بی آر ٹی کے بقیہ فیڈر روٹس کے آغاز کے بعد بی آر ٹی کی یومیہ سفری اعداد وشمار میں نمایاں اضافہ آئے گا۔
مزید براں انکا یہ بھی کہنا تھا کہ حکومت کی جانب سے بی آر ٹی کو مزید تقویت دینے کے حوالے سے مزید 30نئی بسیں منگوائی جارہی ہیں جنکے آنے سے شہریوں کو مزید سہولت میسر ہوگی۔ بعد ازاں تمام معزذ مہمانوں نے بی آر ٹی بس میں بغیر پروٹوکول عام عوام کے ساتھ سفر بھی کیا ۔ دوران سفر شہریوں کی جانب سے بی آر ٹی سسٹم کو بے حد سراہا گیا اور بھرپور اعتماد کا اظہار کیا گیا۔ سپیکر قومی اسمبلی اسد قیصر کا کہنا تھا کہ دورے کا مقصد بی آ رٹی کی افادیت کو جانچنا اور عام عوام کے تاثرات حاصل کرنا تھا جو قابل تحسین ہیں۔ بی آر ٹی پشاور کسی بھی بین الاقوامی پبلک ٹرانسپورٹ سسٹم سے کم نہیں۔
وزیر مملکت برائے پارلیمانی امور علی محمد خان کا کہنا تھا کہ بی آر ٹی منصوبہ حکومت خیبر پختون خواہ کی جانب سے ایک سنگ میل کی حیثیت رکھتا ہے جس پر کام حکومت کی ترجیح اور ان تھک محنت کو ظاہر کررہا ہے۔ بی آر ٹی منصوبے سے جہاں روزانہ لاکھوں لوگ مستفید ہورہے ہیں وہیں اسکی وجہ پشاور میں ایک نمایا ں اور مثبت تبدیلی دیکھنے میں آئی ہے۔
