اوکاڑہ، 24جنوری(اے پی پی): وائس چانسلر یونیورسٹی آف اوکاڑہ پروفیسر زکریا ذاکرنے کہا ہےکہ مساوی اور پیشہ وارانہ تعلیم معاشرے سے غربت ختم کرسکتی ہے،
یونیورسٹیوں کوہر نوجوان تک تعلیم کی رسائی یقینی بنانی چاہیے۔
ان خیالات کا اظہار انہوں نے تعلیم کے بین الاقوامی دن کے موقع پرکیا۔انھوں نے کہا کہ اقوام متحدہ ہر سال 24 جنوری کو تعلیم کے بین الاقوامی دن کے طور پر مناتی ہے جس کا مقصد دنیا بھر میں مساوی تعلیم کی اہمیت کو اجاگر کرنا ہوتا ہے۔
پروفیسر زکریا ذاکر نے کہا کہ تعلیم کے مساوی مواقع اور نوجوانوں کی پیشہ وارانہ تربیت سے معاشرے میں صنفی تفریق ، غربت، بے روزگاری، بیماری اور نا انصافی جیسے مسائل ختم کیے جا سکتے ہیں۔
انہوں نے کہا کہ کرونا وائرس کی وبااور اس کےنتیجے میں پیدا ہونے والی معاشی اور معاشرتی تبدیلیوں کے بعدمساوی تعلیم کی اہمیت اور بھی بڑھ گئی ہے اور ہماری یونیورسٹیوں کو معاشرے کے ہر نوجوان تک تعلیم کی رسائی یقینی بنانے کےلیے اقدامات کرنے چاہیے۔
انہوں نےکہاکہ لاکھوں کی تعداد میں ہمارے نوجوان بہتر طرز زندگی اور روشن مستقبل کی تلاش میں ہیں لیکن یہ سب تعلیم کے بغیر ممکن نہیں۔
وائس چانسلر نے مزید کہاکہ اوکاڑہ یونیورسٹی کی انتظامیہ نے معاشرے کے تمام طبقات تک اعلیٰ تعلیم کی رسائی کےلیے ایک کمیونٹی آوٹ ریچ پروگرام بھی شروع کر رکھا ہے جس کے تحت پسماندہ طبقات کے گھروں تک جا کر ان کو اس بات کی ترغیب دی جاتی ہے کہ وہ اپنے بچوں کو یونیورسٹی بھیجیں۔
