لاہور، 19 جنوری (اے پی پی): وزیراعلیٰ پنجاب سردار عثمان بزدار سے رکن قومی اسمبلی عامر طلال گوپانگ نے ملاقات کی۔ ملاقات میں عامرطلال گوپانگ نے وزیراعلیٰ عثمان بزدار کو علاقے کے مسائل سے آگاہ کیا جس پر وزیر اعلیٰ نے مسائل جلد حل کرنے کی یقین دہانی کرائی۔
وزیر اعلیٰ پنجاب سردار عثمان بزدار نے کہا ترقی کے سفر کو پسماندہ علاقوں تک لے کر گئے ہیں،وسائل کارخ نظر انداز شہروں کی جانب موڑا ہے،سابق دور کی طرح صرف مخصوص شہروں کوترقیاتی فنڈز نہیں دیئے، ہر شہر کی یکساں ترقی کیلئے ٹھوس پالیسی اپنائی ہے۔انہوں نے کہا کہ اپوزیشن نے کھوکھلے نعرے لگا کرسب کو مایوس کیا، نازک حالات میں منفی سیاست کرنے والوں کوہوش کے ناخن لینے چاہئیں۔
وزیراعلیٰ پنجاب سردار عثمان بزدار نے کہاکہ پی ڈی ایم نے قوم کی مشکلات میں اضافہ کیاہے، یہ عناصر ذاتی مفادات کی خاطرپاکستان کے مفادات کو نقصان پہنچا رہے ہیں، عوام کی خدمت ہی ہمارا ایجنڈا ہے، صوبے کے عوام کو سہولتیں پہنچانے کیلئے کوئی کسر اٹھا نہ رکھیں گے۔
