اسلام آباد،14جنوری (اے پی پی):وفاقی وزیر برائے قانون و انصاف بیرسٹر ڈاکٹر محمد فروغ نسیم نے وزارت قانون و انصاف میں جدیدلائبریری اور ریسرچ ونگ کا افتتاح کیا۔ سیکرٹری وزارت قانون وانصاف راجہ نعیم اکبر نے وزیر قانون کو نئی لائبریری کے بہترین پہلوئوں کے بارے میں بتایا۔
جمعرات کو افتتاحی تقریب میں شریک وزیر قانون اور دیگرشرکاء کوسیکرٹری وزارت قانون وانصاف نے قانون سے متعلق مختلف مضامین پر تحقیقی کام کے لئے نئی کتابوں کی خریداری کے سلسلے میں آگاہ کیا۔ انہوں نے کہا کہ اب تک آسان رسائی اور تلاش کے لئے الماریوں میں بار کوڈز کے ساتھ تقریبا 30 ہزار قانونی کتب کا انتظام کیا گیا ہے۔ عدالت سے متعلقہ کتابیں اور قانونی دستاویزات کو پڑھنے کے قابل بنانے اور ان کے پرنٹ نکالنے کے لئے دوبارہ تشکیل دیا گیا ہے۔
وزیر قانون کو بتایا گیا کہ کنسلٹنٹس کے لئے جدید فائبر آپٹکس انٹرنیٹ کنکشن لگایا گیا ہے۔بریفنگ میں بتایاگیاکہ وزارت قانون کی تاریخ میں پہلی بار تین عالمی شہرت یافتہ قومی اور بین الاقوامی آن لائن قانونی پورٹلز کو فعال کردیا گیا ہے۔ اسی طرح ، مغربی قانون اور دیگر اہم ستون بھی فعال بنائے گئے ہیں۔ وزارت تحقیقی مقصد کے لئے اگلی سہ ماہی میں لیکسز نیکسس متعارف کروانے کا ارادہ رکھتی ہے۔ تحقیق کی سہولت کے لئے لائبریری کے اندر 8 ورک سٹیشن قائم کیے گئے ہیں جوکہ لیپ ٹاپ جیسے وائرلیس آئی ٹی اور ٹیلی کام ذرائع کے لئے تیز رفتار وائی فائی روٹرز سے لیس ہیں۔ ویڈیو کانفرنسنگ کے لئے تیزترین وائی فائی انٹرنیٹ اور دیگر ملٹی میڈیا سپورٹ کے ساتھ ایل ای ڈی بھی نصب کی گئی ہے۔
وفاقی وزیرقانون کو پاکستان کوڈ میں بہتری کے بارے میں بھی آگاہ کیاگیا اور بتایا گیاکہ قواعد / احکامات ، سرکاری نوٹیفیکیشن اور ذیلی قوانین کو سرکاری ویب سائٹ پرشائع کرنے کے لئے اسکین کیا گیا ہے۔وزیر قانون کو قائد اعظم محمد علی جناح کے ذاتی استعمال کی کتابیں اور جے ایس ایڈمن عمر عزیز کی جانب سے تحریر کردہ گورنمنٹ انڈیا ایکٹ 1935 بھی دکھایاگیا۔
بیرسٹرڈاکٹر فروغ نسیم نے لائبریری کی بحالی اور جدید خطوط پر اس کی اپ گریڈیشن کی تعریف کی۔ انہوں نے کہا کہ وزارت قانون کے حکام کی کاوشوں سے تحقیق پر مبنی تعلیم کو فروغ ملے گا۔
