لاہور، 22مارچ(اے پی پی): گورنر پنجاب چوہدری محمد سرور نے کہا ہے کہ افواج پاکستان22کروڑ پاکستانیوں کا فخر ہیں۔دفاعی اداروں پر تنقید کرنے والے ملک کے خیر خواہ نہیں ہوسکتے،افواج پاکستان کی قر بانیوں کی بدولت ہی ملک میں امن آیا ہر پاکستانی کو سب سے پہلے ملکی وقومی مفاد کو تر جیح دینی چاہیے ۔
گورنر پنجاب چوہدری محمد سرور سے پیر کو یہاں مختلف وفود نے ملاقات کی۔ملاقات کے موقع پر گفتگو کرتے ہوئے گورنر پنجاب نے کہا کہ قومی اداروں کی مضبوطی ہی اصل میں پاکستان کی مضبوطی ہے جبکہ ملک میں عدم استحکام پیدا کر نے کی سازشیں کر نیوالے ناکام ہونگے۔گورنر پنجاب نے کہا کہ الحمد للہ آج ہرشعبے میں پاکستان درست سمت میں گامزن ہو رہا ہے ، معاشی محاذ پرملکی ترقی کو دنیا کے تمام عالمی ادارے تسلیم کر رہے ہیں ۔
گور نر پنجاب نے کہا کہ موجودہ حالات میں ایس او پیز پر عمل نہ کر نا خود کورونا کو دعوت دینے کے مترادف ہے، کورونا کی نئی لہر پہلے سے زیادہ خطر ناک ہے احتیاط لازم ہے ۔
گور نر پنجاب نے عوام سے اپیل کی کہ کورونا ایس او پیز پر ہر صورت مکمل عمل کر یں۔
