د
تہران، 21پریل (اے پی پی ): وزیر خارجہ مخدوم شاہ محمود قریشی نے کہا ہے کہ ہم، وزیراعظم عمران خان کے ویژن کی روشنی میں دوست ملک ایران کے ساتھ دو طرفہ تعلقات کے استحکام سمیت باہمی دلچسپی کے مختلف شعبہ جات میں دو طرفہ تعاون کے فروغ کے لئے پرعزم ہیں ۔
ان خیالات کا اظہار وزیر خارجہ نے بدھ کو یہاں صدارتی محل آمد پر ایرانی صدر ڈاکٹر حسن روحانی سے ملاقات میں گفتگو کرتے ہوئے کیا،صدارتی محل تشریف آوری پر وزیر خارجہ کا پرتپاک خیر مقدم کیا گیا۔
وزیر خارجہ نے صدرِ پاکستان ڈاکٹر عارف علوی اور وزیراعظم عمران خان کی جانب سے صدر روحانی اور ایرانی قوم کے لئے نیک تمناوں اور خیرسگالی کا پیغام پہنچاتے ہوئے کہا کہ پاکستانی قیادت، کشمیری مسلمانوں کے نکتہ ء نظر کی مسلسل حمایت پر ایرانی سپریم لیڈر آیت اللہ سید علی خامنائی اور صدر روحانی کی حکومت کو خراج تحسین پیش کرتی ہے۔
وزیر خارجہ نے ایرانی صدر سے پاکستان اور ایران کے دیرینہ دوستانہ تعلقات کو مزید مضبوط بنانے کے لئے مختلف طریقہ کار پر گفتگو کرتے ہوئے کہا کہ دونوں ممالک میں مشترک تاریخ، ثقافت، مذہب اور زبان پر مبنی خوشگوار قریبی اور مضبوط تعلقات استوار ہیں۔
صدر حسن روحانی نے ایران کی جانب سے، تجارت، سرمایہ کاری، رابطوں کی استواری اور سرحدی انتظام(باڈر مینجمنٹ ) میں پاکستان کے ساتھ، دو طرفہ تعلقات کو مزید بڑھانے کے ایرانی عزم کا اعادہ کیا۔
ایران میں تعینات پاکستانی سفیر رحیم حیات قریشی بھی وزیر خارجہ کے ہمراہ اس ملاقات میں موجود تھے ۔
