لاہور،25اپریل (اے پی پی):متحدہ علماءبورڈ حکومت پنجاب کے فل بورڈ اجلاس نے نصاب تعلیم سے اسلامی تعلیمات و تاریخ اسلام نکالنے کی سفارشات کو مسترد کرتے ہوئے وزیر اعلیٰ پنجاب سے ذمہ داروں کے خلاف کارروائی کا کہا ہے، نصاب تعلیم میں موجود مواد سے اقلیتوں کو کوئی خطرہ نہیں ، نہ ہی اقلیتوں کے خلاف نصاب میں کوئی توہین آمیز مواد موجود ہے اور نہ ہی اقلیتی طلباءپر اسلامی مواد پڑھنا اور اس کا امتحان دینا ضروری ہے ۔
متحدہ علماءبورڈ کے فل بورڈ اجلاس کے بعد چیئرمین حافظ محمد طاہر محمود اشرفی نے ممبران علماءبورڈ علامہ محمد حسین اکبر، ڈاکٹر محمد راغب حسین نعیمی ،مولانا عبد الحق مجاہد، مولانا عبد الکریم ندیم، مولانا محمد صدیق ہزاروی ، مولانا ضیاءاللہ شاہ بخاری ، پروفیسر ذاکر الرحمن ، مولانا اسد اللہ فاروق ، علامہ زبیر عابد، علامہ طاہر الحسن، مولانا محمد خان لغاری ، مولانا عثمان افضل قادری ، ڈاکٹر سرفراز اعوان ، مولانا محمد امجد خان ، مولانا ظفر اللہ شفیق کے ہمراہ پریس کانفرنس سے خطاب کرتے ہوئے کہا کہ ان سفارشات کو قومی اقلیتی کمیشن بھی مسترد کر چکا ہے اور پاکستان میں رہنے والی تمام اقلیتوں کو آئین پاکستان کے تحت تمام حقوق حاصل ہیں، تاریخ اسلام اور شریعت اسلامیہ سے متعلق نصاب میں موجود مواد کسی بھی صورت کسی بھی اقلیت کی دل آزاری کا سبب نہ ہے۔انہوں نے کہا کہ متحدہ علماءبورڈ نے ہر لمحہ کوشش کی ہے کہ کوئی ایسا تحریری یا تقریری مواد جس سے نفرت پھیلتی ہو اور اس سے اسلامی تعلیمات اور آئین کی خلاف ورزی ہوتی ہو اس کو نصاب کا حصہ نہ بنایا جائے۔
چیئرمین حافظ محمد طاہر محمود اشرفی نے کہا کہ پاکستان میں رہنے والی تمام اقلیتوں کے حقوق کاآئین پاکستان اور پاکستان کے مسلمان محافظ ہیں، گذشتہ چھ ماہ کے دوران اقلیتوں کے مسائل کے حل کیلئے ہر سطح پر موثر کوششیں کی گئی ہیں،جبری مذہب کی تبدیلی سے لے کر توہین ناموس رسالت کے قانون کے غلط استعمال تک کے معاملات کو دیکھا گیا ہے، الحمدللہ ملک میں کہیں بھی توہین ناموس رسالت کے قانون کا غلط استعمال نہیں ہو رہا ہے۔ انہوں نے کہا کہ جبری مذہب کی تبدیلی کے واقعات میں بہت حد تک کمی ہوئی ہے، ایک رکنی اقلیتی کمیشن کی سفارشات پر اقلیتوں کے نمائندے بھی تحفظات کا اظہار کر رہے ہیں۔ انہوں نے کہا کہ اس حوالہ سے عدالت عظمیٰ میں وہ چیف جسٹس آف پاکستان کے سامنے حاضر ہوں گے تا کہ ان کو اصل حقائق بتاسکیں۔
پریس کانفرنس سے خطاب کرتے ہوئے علماءو مشائخ نے عوام الناس سے کرونا سے بچاو کیلئے رجوع الی اللہ اوراحتیاطی تدابیر پر عمل کی اپیل کی ہے۔
