لاہور 29 اپریل(اے پی پی): وزیر اعلی پنجاب سردار عثمان بزدار سے سپیکر پنجاب اسمبلی چودھری پرویز الہی نے وزیراعلیٰ آفس میں ملاقات کی۔ ملاقات میں وزیر اعلی پنجاب اور اسپیکر پنجاب اسمبلی نے کورونا کی صورتحا ل پر اظہا ر تشویش اور کورونا سے بچاؤ کے لئے ایس او پیز کے سخت نفاذ پر اتفاق کیا جبکہ دونوں رہنماؤں نے اس بات پر بھی اتفاق کیا کہ کورونا خطرناک شکل اختیار کر رہا ہے اس کے لیے سخت اقدامات کرنا ہوں گے اور کورونا ویکسین کے عمل میں تیزی لانی ہو گی۔
وزیر اعلیٰ پنجاب عثمان بزدار نے کہا کہ پنجاب بھر میں کورونا ویکسین لگانے کا عمل تیز کردیا ہے، 60 اور 50 سال کے افراد کی ویکسینیشن کے ساتھ 40 سال کے افراد کی رجسٹریشن شروع کر دی ہے، ہسپتالوں کی ضروریات کا جائزہ لیکر اقدامات کر رہے ہیں اور ہسپتالوں میں وینٹی لیٹرز اور آکسیجن بیڈز کی تعداد بڑھائی جا رہی ہے۔
انہوں نے کہا کہ ایس او پیز پر عملدرآمد کرنے سے کورونا کا پھیلاؤکم ہو گا، خصوصی کابینہ کمیٹی تشکیل دے دی ہے جو روزانہ میٹنگ کر کے صورتحال کے تناظر میں فیصلے کرے گی اور اس کمیٹی میں صوبائی وزراء اور سول و عسکری حکام شامل ہیں۔
اس موقع پر ا سپیکر پنجاب اسمبلی چودھری پرویز الہی نے کہا کہ عوام کو کورونا سے بچاو کے لئے اداروں کو متحرک کیا جائے، کورونا کی صورتحال کو روزانہ کی بنیاد پر مانیٹر کرکے فیصلے کئے جائیں۔
