سیالکوٹ،18مئی( اے پی پی): ڈکیتی اور موٹر سائیکل چوری کی وارداتوں میں ملوث 3 رکنی گینگ کو سرغنہ سمیت گرفتار کر لیا گیا ہے۔
ترجمان سیالکوٹ پولیس کے مطابق ایس ایچ او تھانہ سول لائن سب انسپکٹر تحسین محسن نے پولیس ٹیم کے ہمراہ جرائم پیشہ افراد اور مجرمان اشتہاریوں کے خلاف جاری خصوصی مہم میں اپنی پیشہ وارانہ صلاحیتوں کو بروئے کار لاتے ہوئے اور جدید ٹیکنالوجی کی مدد سے ڈکیتی اور چوری وارداتوں میں ملوث حسنین عرف حسنینا گینگ کے ملزمان حسنین،ندی اورعطاالرحمن کو گرفتار کر لیا ہے۔
ملزمان کی گرفتاری سے دوران انٹروگیشن لاکھوں روپے مالیت کی 11 عدد موٹر سائیکلیں، نقدی 15 ہزار روپے اور پسٹل 30 بور معہ متعدد گولیاں برآمد کر لی گئی ہیں۔ ملزمان نے ڈکیتی اور چوری کی درجنوں وارداتوں کے انکشافات کیے ہیں، جن کی گرفتاری سے 13 مقدمات ٹریس ہوئے ہیں۔ ڈی پی او سیالکوٹ نے پولیس ٹیم میں موجود تمام افسران و ملازمان کو تعریفی سرٹیفکیٹ و نقد انعام دینے کا اعلان کیا ہے اور ہدایت کی ہے کہ عوام کے جان و مال کی ٍحفاظت کو ہر صورت یقینی بنایا جائے۔
