اسلام آباد،15مئی (اے پی پی):وزیر داخلہ شیخ رشید احمد نے کہا ہے کہ شہباز شریف کا نام ای سی ایل میں ڈالنے کے حوالے سے پچھلے کئی دنوں سے میڈیا میں شور ہےتاہم ابھی تک شہباز شریف کا نام ای سی ایل میں نہیں ڈالا گیا ہے ،اس متعلق سمری کیبنیٹ ڈویژن سے واپس نہیں آئی، سوموار یا منگل کو آسکتی ہے، اس کیس میں پہلے ہی 14بندوں کا نام ای سی ایل میں ہے ۔
ہفتہ کو اپنے ویڈیو پیغام میں وزیر داخلہ نے کہا کہ شہباز شریف نے بیرون ملک علاج کیلئے جانے سے متعلق کوئی میڈیکل رپورٹ پیش نہیں کی، ان کے خاندان کے پانچ ملزمان مفرور ہیں۔انہوں نے کہا کہ شہباز شریف خود نواز شریف کے گارنٹر ہیں،وہ سیدھا لندن نہیں جارہے تھے، 15دن قطر میں قرنطینہ کے بعد یوکے جانا تھا، ہمارے پاس ان کی کوئی میڈیکل رپورٹ نہیں آئی ،سمری پر فیصلہ لاء اور داخلہ کی وزارت کرے گی اور فیصلہ آئین اور قانون کے مطابق ہوگا۔
وزیر داخلہ شیخ رشید احمد نے کہا کہ عید الفطر کی تعطیلات کے دوران پاک فوج، پولیس اور دیگر اداروں نے بہترین کام کیا اور عوام نے ایس او پیز پر عمل کیا۔ انہوں نے کہا کہ پاکستان مین کورونا وائرس کی شرح کم ہوگئی ہے، بھارت کا ہولناک وائرس برطانیہ تک پھیل گیا ہے۔
