لاہور ،3 مئی(اے پی پی): وزیراعلیٰ پنجاب سردار عثمان بزدار نے کہا ہے کہ پی ڈی ایم کی منفی سیاست اپنی موت آپ مر چکی ہے، مسترد شدہ عناصرکی انتشار کی سیاست کو عوام نے رد کر دیا ہے۔
پیر کو یہاں رکن قومی اسمبلی راحت امان اللہ اور مسلم لیگ (ن) کے رکن پنجاب اسمبلی میاں جلیل احمد شرقپوری سے ملاقات میں وزیراعلیٰ پنجاب کا کہنا تھا کہ پی ڈی ایم کا جو حشر ہوا ہے وہ سبق آموز بھی ہے اور عبرتناک بھی، اپوزیشن کی جانب سے موجودہ صورتحال میں قوم کو تقسیم کرنے کی کوشش بری طرح ناکام رہی۔
ملاقات میں دونوں رہنماؤں نے وزیراعلیٰ عثمان بزدار کو اپنے حلقوں کے مسائل سے آگاہ کیا جس پر وزیراعلیٰ عثمان بزدار نے مسائل حل کرنے کی یقین دہانی کرواتے ہوئے کہا کہ پاکستان کی عوام باشعور ہیں اورکرپٹ عناصر کے جھانسے میں کبھی نہیں آئے گی اور نہ ہی لوٹ مار کا دور کبھی واپس آئے گا، شور مچانے والے عناصر پہلے اپنے گریبان میں جھانکیں۔
اس موقع پر میاں جلیل شرقپوری نے کہا کہ آپ کی قیادت اور پالیسیوں پر پورا اعتماد ہے، ہم آپ کے ساتھ ہیں اور عوام کی خدمت کے سفر میں آپ کے ساتھ کھڑے ہیں۔
