لاہور 29 جون (اے پی پی): وزیر اعلی پنجاب سردار عثمان بزدار سے سابق وزیر اعلی سندھ ارباب غلام رحیم نے یہاں لاہور میں ملاقات کی۔ ملاقات میں باہمی دلچسپی کے امور اور سیاسی صورتحال پر تبادلہ خیال کیا گیا ارباب غلام رحیم نے پنجاب کا عوام دوست اورریکارڈ ڈویلپمنٹ بجٹ پیش کرنے پر وزیر اعلی عثمان بزدار کے ویژن کی تعریف کرتے ہوئے کہا کہ آپ کا صوبے کی یکساں ترقی کا ویژن قابل تحسین ہے ہر ضلع کا علیحدہ ڈویلپمنٹ پیکیج تیار کر کے پنجاب حکومت نے دیگر صوبوں کو پیچھے چھوڑدیا ہے کاش سندھ حکومت بھی عوام کی فلاح و بہبود کے لئے پنجاب حکومت کو رول ماڈ ل بنائے، آپ نے تین برس کے دوران پنجاب میں بے پناہ کام کیا ہے ہم آپ کی مزید کامیابیوں کے لئے دعا گو ہیں۔
وزیر اعلیٰ عثمان بزدار کا کہنا تھا کہ مختصر مدت میں جو کام کر چکے ہیں وہ سابق حکومتیں 70 برس میں نہ کر سکیں ہم بولتے کم اور کام زیادہ کرتے ہیں سابق حکمرانوں نے کام کم کیا لیکن ڈھنڈورا زیادہ پیٹا، ماضی کی حکومت نے اداروں کو سیاسی مداخلت کے ذریعے تباہ کیا لیکن ہماری حکومت نے اداروں کو خود مختار بنایا ہے اور میرٹ پر تعیناتیاں کی ہیں پنجاب میں ذاتی پسند و نا پسند کے کلچر کو ختم کر کے میرٹ کو فروغ دیا ہے پنجاب میں تعلیم، صحت اور دیگر سماجی شعبوں کی ترقی کے لئے نئے مالی سال کے بجٹ میں بہت زیادہ اضافہ کیا گیا ہے،
560 ارب روپے کے سالانہ ترقیاتی پروگرام سے صوبے کا ہر ضلع ترقی کی نئی منازل طے کرے گا اور ترقی کے سفر میں ہم دیگر صوبوں کو بھی ساتھ لے کر چلیں گے۔
