مظفرگڑھ،25جون(اے پی پی): پنجاب فوڈ اتھارٹی کی ڈیری سیفٹی ٹیم نے علاقے ہیڈ بکینی کے قریب ملک کولیکشن سنٹر اور دودھ بردار گاڑی کی چیکنگ کی جس دوران 950 لیٹر ملاوٹی دودھ تلف کردیا گیا۔
ڈی جی فوڈ اتھارٹی رفاقت علی نسوانہ کے مطابق کولیکشن سنٹر میں موجود دودھ کو جدید لیکٹوسکین مشین کے ذریعے چیک کیا گیا، دودھ میں مضر صحت کیمیکلز اور پانی کی ملاوٹ پائی گئی۔
ناکہ بندی کے دوران گاڑی نمبر J5590 میں موجود دودھ کے معیار کو بھی چیک کیا گیا، معیار بہتر نہ ہونے پر دودھ بردار گاڑی مالکان کو 10 ہزار روپے جرمانہ کیا گیا۔
ڈی جی فوڈ اتھارٹی نے بتایا کہ ملاوٹی دودھ کا استعمال بچوں اور بڑوں کی ہڈیوں کو کمزور بنادیتا ہے اور عوام تک ملاوٹ سے پاک دودھ کی فراہمی یقینی بنانا پنجاب فوڈ اتھارٹی کی اولین ترجیح ہے۔
