لاہور، 2 جون(اے پی پی): وزیراعلیٰ پنجاب سردار عثمان بزدار سے ایم این اے چودھری مونس الہی کی قیادت میں مسلم لیگ ق کے وفد نے ملاقات کی، ملاقات میں باہمی دلچسپی کے امور اورسیاسی صورتحال پر تبادلہ خیال کیا گیا۔
وزیر اعلیٰ پنجاب عثمان بزدار نے کہا کہ وزیر اعظم عمران خان کی قیادت میں پاکستان معاشی ترقی کی راہ پر گامزن ہو چکا ہے، موجودہ حالات میں انتشار کی سیاست کی کوئی گنجائش نہیں، افراتفری پھیلانے کی کوشش کرنے والے عناصر دشمن کے ایجنڈے پر چل رہے ہیں، مایوسی کا شکار اپوزیشن عوام کو گمراہ نہیں کرسکتی۔
انہوں نے کہا کہ مسلم لیگ ق ہماری اتحادی ہے اور اتحادیوں کے ساتھ تعلقات پہلے سے زیادہ مضبوط ہیں، اتحادی جماعت سے بہترین ورکنگ ریلیشن شپ ہے اور ایک دوسرے کو ساتھ لے کر چل رہے ہیں، فیصلہ سازی کے عمل میں مسلم لیگ (ق) کو شریک کیا گیا ہے، ہر ضلع کا علیحدہ ڈویلپمنٹ پیکیج تیار کیا ہے جلد گجرات اور منڈی بہاؤالدین کا دورہ کروں گا۔
اس موقع پر ایم این اے چودھری مونس الہی نے کہا کہ عوام کو مزید سہولتیں فراہم کرنے کیلئے مل کر کام جاری رکھیں گے، ہمارا نصب العین صرف عوام کی خدمت ہے اور ملکر عوامی خدمت کرتے رہیں گے ہم ایک ہیں اور ایک رہیں گے، وزیر اعلی عثمان بزدار کی جانب سے ڈسٹرکٹ ڈویلپمنٹ پیکیج کا اعلان خوش آئند ہے۔
