اسلام آباد،17جولائی (اے پی پی):وفاقی وزیر داخلہ شیخ رشید احمد نے کہاہے کہ سی پیک اور پاک چین دوستی کے دشمنوں کو کسی صورت معاف نہیں کیاجائے گا ، پاکستان امن کا داعی ہے ، پاکستان کا امن افغانستان کے ا من سے وابستہ ہے ،چینیوں کی حفاظت ہمارا فرض ہے ، وزیراعظم عمران خان نے جرات کے ساتھ کہاہے کہ اب ڈو مور نہیں بلکہ “نوٍ مور” ، داسو حادثہ پر وزیر اعظم نے چینی ہم منصب سے فون پربات کی ہے اور وزارت داخلہ کو چینی انجینئرز کی سکیورٹی مزیدسخت کرنے کی ہدایت کی گئی ہے ، وزیر خارجہ کو بھی چین جانے کی ہدایت کی گئی ہے،چینی حکومت اورعوام کویقین دلاتے ہیں کہ ان چھپے ہاتھوں،سی پیک دشمنوں کو نہیں چھوڑیں گے ،چین کے ساتھ ہمالیہ سے بلند دوستی ہے ،پاکستان کو اس دوستی پرفخر ہے ۔
ان خیالات کا اظہار وفاقی وزیر داخلہ نے ہفتہ کو میڈیا سنٹر اسلام آباد میں پریس کانفرنس سے خطاب کرتے ہوئے کیا ۔وفاقی وزیر داخلہ نے کہاکہ رات وزیراعظم عمران خان دورہ ازبکستان کے کامیاب دورہ کے بعدواپس آئے ، یہ دورہ کامیاب ترین تھا،اشرف غنی سے عمران خان کی ملاقات پر وزارت خارجہ بات کر سکتی ہے ۔انہوں نے کہاکہ پاکستان افغانستان میں امن کا خواہاں ہے ۔ایک سوال کے جواب میں وفاقی وزیر داخلہ نے کہاکہ چند سو پاسپورٹ جن لوگوں نے جعلی جاری کئے ان میں سے مجموعی طور پر 8 گرفتار کر چکے ہیں،19 لوگوں کو شوکاز نوٹسز جاری کیے جا چکے ہیں ۔انہوں نے کہاکہ داسو واقعہ کی تحقیقات فائنل سٹیج پر ہیں،چین کی پندرہ رکنی ٹیم بھی تحقیقات کے لئے آ چکی ہے جو جائے حادثہ پر جا چکی ہے ۔
وفاقی وزیر داخلہ نے کہاکہ کشمیر میں آزادانہ منصفانہ اور شفاف انتخابات کے انعقاد کے لیے تمام وسائل بروئے کار لائے جارہے ہیں ، اے جے کے انتخابات میں امن و امان کی صورتحال برقرار رکھنے کے لیے رینجرز اور ایف سی کے 7200جوانوں کو ذمہ داریاں سونپی گئی ہیں ۔انہوں نے کہاکہ آزاد کشمیر کے الیکشن میں امن و امان کی صورتحال برقرار رکھنے کے لیے الیکشن کمیشن آزاد کشمیر کی درخواست پر رینجرز اور ایف سی جوانوں کو ذمہ داریاں سونپی گئی ہیں ۔یہ جوان سول ایڈمنسٹریشن اے جے کے سے مل کر خدمات سرانجام دیں گے ، انتخابات کے موقع پر اگر انتظامیہ نے مزید سکیورٹی کی درخواست کی تو اضافی نفری بھی بھجوائیں گے ۔انہوں نے کہاکہ وزیر اعظم آج سے کشمیر میں مہم شروع کر رہے ہیں،ان کے ہمراہ جائوںگا،کشمیر میں پی ٹی آئی کی حکومت بنے گی،جتنی سکیورٹی مانگی گئی،کشمیر الیکشن کے لئے دی ہے،مزید سیکورٹی مانگی گئی تو دیں گے ۔انہوں نے کہاکہ لاہور واقعہ پر ملزمان گرفتار ہوئے،کو ئٹہ میں بھی کوشش کی گئی،ان ملزمان کو بھی گرفتار کریں گے۔
ایک سوال کے جواب میں وفاقی وزیر داخلہ نے کہاکہ بارڈر مینجمنٹ کو وزارت داخلہ دیکھ رہی ہے،تمام ادارے چوکس ہیں،ہندوستاں پاکستان میں مداخلت کا کوئی موقع نہیں جانے دیتا ، پشاور میں طالبان کے جھنڈے اٹھانے والوں کو گرفتار کیا گیا۔ایک اور سوال کے جواب میں وزیر دخلہ نے کہاکہ واضح اعلان ہے کہ سرزمین کوافغانستان کے لئے استعمال نہیں ہونے دیں گے نہ کسی کی سرزمین کو اپنے خلاف استعمال ہونے دیں گے ، دنیا کی کوئی سپرپاوور پاکستان کو بائی پاس نہیں کر سکتی ۔
