اسلام آباد، 02 جولائی (اے پی پی ):صدر مملکت ڈاکٹرعارف علوی نے کہا ہے کہ پاکستان اور سعودی عرب کے مابین اقتصادی اور سرمایہ کاری کے تعاون کو مزید مستحکم کرنے کی ضرورت ہے، دونوں ممالک کے مابین مشترکہ عقیدے ، ثقافت ، روایت اور باہمی خیر سگالی کی بنیاد پر برادرانہ تعلقات ہیں۔
ان خیالات کا اظہار صدر مملکت ڈاکٹرعارف علوی نے پاکستان میں سعودی عرب کے سفیر نواف بن سعید المالکی سے گفتگو کرتے ہوئے کیا ، جنہوں نے جمعہ کو یہاں ان سے ملاقات کی ۔ صدر مملکت نے کہا کہ دونوں ممالک کے مشترکہ مفاد کے لئے باہمی تعلقات کو وسعت دینے کی ضرورت ہے، پاکستان توانائی ، سائنس ، ٹیکنالوجی ، زراعت اور ثقافت سمیت باہمی دلچسپی کے تمام شعبوں میں تعاون کا خواہاں ہے۔انہوں نے کہا کہ پاکستانی کمیونٹی سعودی عرب کی سماجی و معاشی ترقی میں اہم کردار ادا کررہی ہے، امید ہے کہ سعودی حکومت پاکستانی شہریوں پر سفری پابندیوں میں آسانی پیدا کرے گی۔
صدر مملکت ڈاکٹرعارف علوی نے کہا کہ پاکستانی عوام اور حکومت خادمینِ حرمین شریفین اور سعودی عرب کی قیادت کو احترام کی نگاہ سے دیکھتے ہیں ، پاکستان ادارہ جاتی روابط کی مدد سے میڈیا اور ثقافت کے میدان میں دوطرفہ تعلقات کو وسعت دینا چاہتا ہے، انہوں نے مشکل وقتوں میں پاکستان کی مددکرنے پر سعودی عرب کے تعاون اور اسلامی دنیا میں اتحاد کے فروغ ، علاقائی اور بین الاقوامی امن و سلامتی کے لئے سعودی کوششوں کو سراہا۔
سعودی عرب کے سفیر نواف بن سعید المالکی نے کہا کہ برادر ممالک کے مابین معیشت ، تجارت اور ثقافت کے شعبوں میں تعاون کو فروغ دینے کی ضرورت ہے۔
