پشاور، 14اگست(اے پی پی): ضلع خیبر لنڈی کوتل خیبر تکیہ کے مقام پر جشن آزادی کی خوشی میں زڑگے پاکستان کے چیئر مین شاکر آفریدی کی طرف سے پہاڑ پر بننے والے سب سے بڑے پاکستان کے سبز ہلالی پرچم کا افتتاح وفاقی وزیر برائے مذہبی امور پیرنورالحق قادری اور کمانڈنٹ خیبر رائفلز کرنل رضوان نذیر نے کردیا۔
جشن آزادی کی خوشی میں لنڈی کوتل خیبر پہاڑ پر بننے والے پرچم کی لمبائی 450فٹ اور چوڑائی 350فٹ ہے جس پر بہت محنت کی گئی ہے۔
لنڈی کوتل میں پاکستان کے سب سے بڑے پرچم کے افتتاح کے موقع پر وفاقی وزیر برائے مذہبی امور پیرنورالحق قادری نے خطاب کرتے ہوئے کہا کہ آزادی ایک بڑی نعمت ہے اور اسی دن پاکستان انگریزوں اور ہندو کی غلامی سے آزاد ہوکر ایک آزاد اور خود مختار ملک بن گیا۔
وفاقی وزیر برائے مذہبی امور پیرنورالحق قادری نے کہا کہ قبائلی عوام محب وطن ہیں اور ہمیشہ انہوں نے مشکل حالات میں پاکستان کی سلامتی اور سرحدوں کی حفاظت کے لئے قربانیاں دی ہیں. ملک اور علاقے میں پاک فوج اور سیکورٹی فورسز اور مشران اور عوام کی قربانیوں سے امن قائم ہو گیا ہے اور آئندہ بھی قبائلی عوام کسی قربانی سے دریغ نہیں کرینگے۔
انہوں نے کہا کہ پاکستان کے خلاف سازش کرنے والے کبھی بھی کامیاب نہیں ہونگے پاکستان قیامت تک سلامت اور قائم رہے گا. قبائلی عوام محب وطن ہیں جس کی زندہ مثال گزشتہ کئی سالوں سے قبائلی عوام کا ملک کے دیگر حصوں کی طرح جشن آزادی جوش وجزبے سے منانا ہے۔
وفاقی وزیر برائے مذہبی امور پیرنورالحق قادری نے کہا کہ لنڈی کوتل زڑگئے پاکستان کے چیئرمین نے شاکر آفریدی نے 2019 میں دنیا میں پاکستان کا سب سے بڑا سبز ہلالی پرچم بنایا تھا جبکہ 2020 میں جشن آزادی کی خوشی میں سب سے بڑا کیک اور آج لنڈی کوتل خیبر زخہ خیل کے پہاڑ پر پاکستان کا سب سے بڑا سبز ہلالی پرچم بنا دیا ہے جوکہ پاکستان کے ساتھ محبت اور قربانی کا سب سے بڑا ثبوت ہے۔
لنڈی کوتل جشن آزادی کے موقع پر پہاڑ پر پاکستان کا سب سے بڑا سبز ہلالی پرچم بنانے پر کمانڈنٹ خیبر رائفلز کرنل رضوان نزیر نے شاکر آفریدی کو 50ہزار روپے نقد انعام بھی دیا۔
