اسلام آباد،03اگست (اے پی پی): وزیر مملکت اطلاعا ت و نشریات فرخ حبیب نے کہا ہے کہ پاکستان ایٹمی ملک ہے اس کا نہ صرف خطے بلکہ عالم اسلام میں ایک اہم مقام ہے ،سی پیک بھارت کو کھٹکتاہے ، پاکستان کی بہتری اور ترقی کے ہر منصوبے میں ملک دشمن قوتیں روڑےاٹکارہی ہیں ، انھیں مل کر ناکام بنانا ہوگا ،وزیراعظم عمران خان نے افغانستان میں پر امن سیاسی مفاہمت کے لئے کردار جاری رکھا ہوا ہے، ہم چاہتے ہیں کہ امن کو موقع ملے ، پاکستان کسی جنگ یا انتشار کا حصہ نہیں بننا چاہتا۔ وہ منگل کو اسلامی نظریاتی کونسل میں مختلف مسالک کے درمیان روابط کے حوالے سے فکری نشست سے خطاب کرہے تھے ۔
وزیر مملکت فرخ حبیب نے کہا کہ اسلام نظریاتی کونسل بین المسالک اتحاد اور روابط مضبوط کرنے ، دینی معاملات اوران سے منسلک معاشرتی پہلوؤں پر پوری قوم کی راہنمائی کرنے کے لئے اہم کر دار ادا کر رہی ہے ۔قومی سطح پر حکومت اور عوام کو اسلامی نظریاتی کونسل سے بہترین راہنمائی مل رہی ہے ۔ انہوں نے کہا کہ پاکستان کا آئین تمام لوگوں کو آزادی رائے کا حق دیتا ہے ، اس کے ساتھ ہمارے کچھ پیرامیٹرز بھی موجود ہیں ،ان پر عمل درآمد ذمہ داری کا پہلو ہے ۔
انہوں نے کہا کہ حالیہ دنوں میں یورپین ڈس انفولیب کے تحت معلوم ہوا کہ بھارت مختلف ویب سائٹس ، سوشل میڈیا پر اکاؤنٹس سے جعلی خبروں کے ذریعے پاکستان کے خلاف پروپیگنڈا کر رہا تھا ،آج کا دور انفارمیشن کا دور ہے ،آج کا دور ففتھ جنریشن اور وارآف اوپنین کا دور ہے ، اس میں تمام مسالک سے تعلق رکھنے والے علما کی کی ذمہ داری بڑھ جاتی ہے ، علما ممبر ،محراب ،دینی اور معاشرتی سطح پر عوام سے رابطہ میں رہتے ہیں،لوگ مختلف عوامل اور مسائل پران سے راہنمائی چاہتے ہیں ۔انہوں نے کہاکہ سوشل میڈیا پر اگر انفرادی سطح پر ایسی ویڈیو اپ لوڈ اور وائرل ہوجاتی ہے جس سے کسی کی دل آزاری ہوتی ہے تو اس کا مطلب یہ ہے کہ یہ کام کرنے والے کی سوچ اور فکر کا وہ معیار نہیں کہ وہ اس کے نتائج پر غور و فکر کر سکے بلکہ وہ ایسے ہی اس کو آگے بڑھاتے ہیں اور اس سے معاشرے میں نفرت بڑھتی ہے اور فرقہ واریت کو ہوا ملتی ہے ۔
انہوں نے کہا کہ دنیا پاکستان کے کردار کو تسلیم کرتی ہے ،حالیہ دنوں میں پاکستان نے افغانستان میں امن عمل میں مثبت کردار جاری رکھا۔ وزیراعظم عمران خان نے افغانستان میں پر امن سیاسی مفاہمت کے لئے کردار جاری رکھا ہوا ہے، ہم چاہتے ہیں کہ امن کو موقع ملے ، پاکستان کسی جنگ یا انتشار کا حصہ نہیں بننا چاہتا ۔ انہوں نے کہا کہ سی پیک ایسا منصوبہ ہے جس کی اپنی اہمیت ہے ، پاک چین کی دوستی بہت گہری ہے ،دونوں ہمسایہ اور دوست ممالک مشکل وقتوں میں ایک دوسرے کے ساتھ کھڑے رہے ہیں ،انفراسٹرکچر ، سماجی ترقی سمیت ہر شعبے میں چین کا تعاون حاصل ہے ۔ انہوں نے کہا کہ سی پیک ہمارے دشمن ملک بھارت کو کھٹکتا ہے ، اتحاد اور مضبوطی کے ذریعے ہم نے انتشار کاگلہ دبانا ہے ، ملک میں امن اور قومی سلامتی کے امور پر اپنے اتحاد کو مزید مضبوط بنانا ہے ، کسی بھی ناسمجھ یا کم عقل کو موقع نہیں دینا کہ وہ سمجھتے یا نہ سمجھتے ہوئے دشمن کا آلہ کار بنے ۔
انہوں نے کہا کہ ہمارے آپس کے اختلافات کو ملک دشمن قوتوں نے استعمال کرنے کی کوشش کی جسے پہلے ہم نے ناکام بنایااور ایسے ہی آئندہ بھی ایسی مذموم کوششوں کو ناکام بنانا ہے ۔ انہوں نے کہا کہ جس طرح پاکستان نے گذشتہ سال کورونا وائرس کی وبا کے باوجود جی ڈی پی 4فیصد رکھا اور 29ارب روپے کی ترسیلات زر پاکستان آئیں ، جولائی میں ہم نے اڑھائی ارب ڈالر کی برآمدات کی ہیں ، برآمدات میں اضافہ ہوا تو معاشی طور پر مستحکم ہوں گے ۔ انہوں نے کہا کہ پیغام پاکستان پر 1800سے زائد علما ، مفتیان کرام کے دستخط ہیں ،اسی سوچ اور عمل کو آگے لیکر چلناہے ۔
