اسلام آباد،09ستمبر(اے پی پی):سربراہ پاک فضائیہ ایئر چیف مارشل ظہیر احمد بابر سدھو سے ایران کے سفیرسید محمد علی حسینی نے جمعرات کو یہاں ملاقات کی ہے، ملاقات میں دونوں معززین کا پیشہ ورانہ اور باہمی دلچسپی کے امور پر تبادلہ خیال کیا گیا۔
ایئر چیف مارشل ظہیر احمد بابر سدھو نے کہا کہ پاکستان اور اسلامی جمہوریہ ایران کےمابین دیرینہ مذہبی،ثقافتی اورتاریخی رشتہ قائم ہے۔ انہوں نے دونوں دوستانہ ممالک کی فضائی افواج کے مابین تعلقات کو مزید فروغ دینے کے عزم کا اظہار کیا۔
ایران کے سفیرسید محمد علی حسینی نے کہا کہ پیشہ وارانہ مہارت اور ایوی ایشن انڈسٹری میں خود انحصاری کی طرف گامزن پاک فضائیہ قابل تعریف ہے۔
