اسلام آباد،22ستمبر (اے پی پی):وفاقی وزیر داخلہ شیخ رشید احمد نے کہا ہے کہ جو لوگ سمجھتے ہیں کہ نیوزی لینڈ کی ٹیم کے واپس جانے سے پاکستان تنہا ہو جائے گا، وہ عقل کے اندھے ہیں، ایک دن آئے گا جب دنیا بھر سے ٹیمیں کرکٹ کھیلنےپاکستان آئیں گی، ہم زندہ قوم ہیں، ہمیں تنہاءنہیں کیا جا سکتا۔
ان خیالات کا اظہار انہوں نے بدھ کو وفاقی وزیر اطلاعات چوہدری فواد حسین کے ہمراہ پریس کانفرنس سے خطاب کرتے ہوئے کیا۔ وزیر داخلہ شیخ رشید احمد نے کہا کہ پہلے ہی کہہ دیا تھا کہ برطانیہ کی کرکٹ ٹیم پاکستان کا دورہ نہیں کرے گی، اس کی بنیادی وجہ یہ ہے کہ ہندوستان کے 66 کیمپ ہمارے پڑوس میں ختم ہوئے ہیں، ادھر صف ماتم بچھی ہوئی ہے، بھارت کے ٹی وی چینلز پر کوئی پروگرام ایسا نہیں ہے جس میں پاکستان مخالف سرگرمی نہ ہو، بھارت کو افغانستان کے حوالے سے دنیا بھر میں سبکی کا سامنا کرنا پڑا ہے۔ انہوں نے کہا کہ مایوسی کفر ہے، ایک دن آئے گا جب دنیا کی ٹیمیں پاکستان آئیں گی۔ اس ملک کا وزیراعظم خود ایک ٹیم کا کپتان رہا ہے جس نے ورلڈ کپ جیتا ہے۔
وفاقی وزیر داخلہ شیخ رشید احمد نے کہا کہ میرا پوری قوم کے لئے پیغام ہے کہ ہم ایک زندہ قوم ہیں، ہمیں تنہاءنہیں کیا جا سکتا اور نہ ہی ہمیں نظر انداز کیا جا سکتا ہے۔ آنے والے دن پاکستان کے ہیں، ہم عمران خان کی قیادت میں پاکستان کو آگے لے کر جائیں گے۔
