بہاولنگر، 01 ستمبر(اے پی پی): وزیر اعلیٰ پنجاب سردار عثمان بزدار کی ہدایت پر اراضی ریکارڈ سینٹر بہاولنگر سمیت ضلع بھر میں ریونیو خدمت کچہریوں کا انعقاد کیا گیا، بہاولنگر میں منعقدہ خدمت کچہری کی سربراہی ڈپٹی کمشنر شفقت اللہ مشتاق نے کی۔ اس موقع پر ایڈیشنل ڈپٹی کمشنر ریونیو عابد حسین بھٹی ،اسسٹنٹ کمشنر بہاول نگر سیدعثمان منیر بخاری متعلقہ ریونیو افسران اور سٹاف بھی موجود تھا۔ ریونیو خدمت کچہری میں ریونیورریکارڈ کی درستگی،فردانتقالات ، رجسٹری،ڈومیسائل اور سائلین کے ریونیو مسائل کو فی الفور حل کیا گیا اور درخواستیں بھی وصول کی گئیں اور لوگوں کے ریونیو سے متعلق مسائل کے لئے موقع پر احکامات جاری کئے گئے۔
اس موقع پرڈپٹی کمشنر شفقت اللہ مشتاق نے کہا کہ حکومت ریونیوسسٹم کو جدید تقاضوں سے ہم آہنگ کررہی ہے ریونیو عوامی خدمت کچہری اسی سلسلہ کی کڑی ہے. انہوں نے کہا کہ ضلع بہاولنگر میں وزیراعظم کے وژن اور سینئر ممبر بورڈ آف ریونیو کی ہدایت کے مطابق 32 قانونگوئی حلقوں میں دیہی مال مراکز بنا ئے گئے ہیں اور اس کا دائرہ کار پٹوار سرکلز تک پھیلایا جارہا ہے۔
انہوں نے کہا کہ اب عوام کو ریونیو معاملات کے لئے تحصیلوں اورضلع کی سطح پر آنے کی ضرورت نہ ہوگی. ریونیو سسٹم میں انقلابی تبدیلیاں لائی جارہی ہیں اس سے لوگوں کو بھر پور ریلیف حاصل ہورہا ہے اور کہا کہ بزدار حکومت نے اداروں پر عوام کا اعتماد بحال کرکے فرسودہ اور تاخیری حربوں پر مبنی ریونیوسسٹم میں انقلابی اور جدید ٹیکنالوجی کو فروغ دیا ہے اور سرکاری دفاتر میں عوام کے لیے آسانیاں اور خدمات میں بہتر ریسپانس کے لیے اقدامات بروئے کار لائے جارہے ہیں۔
