اٹک، 22 ستمبر(اے پی پی): حضرت امام حسین ؓو شہدائے کربلا کے چہلم کے حوالے سے ضلعی امن کمیٹی کا ایک اہم اجلاس ڈی سی آفس اٹک میں منعقد ہوا۔ڈپٹی کمشنر اٹک عمران حامد شیخ، ڈی پی او اٹک رانا شعیب محمود، اسسٹنٹ کمشنرز، ممبران امن کمیٹی پیر سعادت علی شاہ، مولانا محمود الحسن توحیدی، مولانا شیر زمان، سید وقار نقوی، علامہ عارف حسین واحدی،عبدالرحمن، ساجد علی نقوی، سید نیاز حسین شاہ، قمر عباس،شیخ محمد یونس،لیا قت علی رانجھا،سید سعید حیدر ہمدانی اور دیگر ممبران و افسران بھی موجود تھے۔
اجلاس سے خطاب کرتے ہوئے شرکاء نے کہا کہ محرم الحرام و صفر المظفر کے مہینے ہمیں اتحاد و یگانگت،صبر و استقامت کادرس دیتا ہے۔امام عالی مقام رضی اللہ عنہ اور ان کے ساتھیوں کی میدان کربلا میں شہادت ہمیں باطل کے سامنے مضبوطی سے کھڑا ہو نے کا سبق سکھاتی ہے۔ضرورت اس امر کی ہے کہ ہم شہدائے کربلا کی بے مثال قربانیوں کے لازوال درس پر عمل کر یں اور اپنی زندگیوں کو اللہ تعالیٰ، حضرت محمد مصطفیﷺ، اہل بیت اطہار اور صحابہ اکرام رضوان اللہ اجمعین کی سنت کے مطابق گزاریں تاکہ دنیا و آخرت میں فلاح پاسکیں۔یہ مبارک مہینے ہمیں ایثار و قربانی سے ہمکنار کر تے ہیں۔ ہمیں چاہئے کے اللہ تعالیٰ کے پسندیدہ لوگوں کی زندگیوں کو مشعل راہ بنائیں تاکہ روز محشر اللہ تعالیٰ اورحضرت محمد مصطفیﷺ کے سامنے کامیابی حاصل کر سکیں۔
اجلاس میں حضرت امام حسین رضی اللہ عنہ و شہدائے کر بلا کے چہلم سے متعلق تمام امور زیر بحث لائے گئے۔ تمام شر کاء نے اپنی بھرپور رائے کا اظہار کیا اور مختلف تجاویز پیش کیں۔اجلاس سے خطاب کرتے ہوئے ڈی سی اٹک عمران حامد شیخ نے محرم الحرام کے دوران مثالی امن و امان کے قیام لے لیے تمام مکتبہء فکر کے علماء اکرام کو شاندار الفاظ میں خراج تحسین پیش کیا۔
انہوں نے کہا کہ حضرت امام حسین رضی اللہ عنہ و شہدائے کربلا کے چہلم کے موقع پر تمام مذہبی اجتماعات کو مکمل میونسپل سروسز فراہم کی جائیں گی۔عوام سے اپیل ہے کہ وہ ان اجتماعات میں جاتے ہوئے کورونا ایس او پیز پر بھر پور عمل درآمد کر یں۔ ضلعی و تحصیل سطع پر کنٹرول رومز بھی قائم کیے جائیں گے جہاں سے تمام اجتماعات کی مکمل اور سخت نگرانی کی جائے گی۔
ڈی پی او اٹک رانا شعیب محمودنے کہا کہ چہلم کے موقع پر فول پر وف سیکورٹی کے انتظامات کیے جائیں گے۔مذہبی منافرت پھیلانے والوں کے ساتھ سختی سے نمٹا جائے گا اور اس ضمن زیرو ٹالر نس کی پالیسی اپنائی جائے گی۔ ضلع پولیس مذہبی اجتماعات کے منتظمین کے ساتھ مکمل رابطے میں ہے۔سوشل میڈ یا کے مواد کو سختی سے مانیٹر کیا جائے گا اور کسی بھی قسم کے قابل اعتراض مواد کو کسی بھی قسم کے میڈ یا چینل پر نشر کر نے کی اجازت نہیں ہو گی۔
ممبران امن کمیٹی نے انتظامیہ کو مکمل تعاون کی یقین دہانی کروائی۔آخر میں مولانا محمود الحسن توحیدی نے ملک میں امن و سلامتی کے لئے دعا کروائی۔
