خواتین کو باختیار بنانے کے لیے ان کی مالی شمولیت ضروری ہے، خواتین مالی طور پر مستحکم ہوں گی تو ان کا استحصال نہیں کیا جا سکے گا؛ صدرمملکت ڈاکٹرعارف علوی

اسلام آباد،17ستمبر  (اے پی پی):صدرمملکت ڈاکٹرعارف علوی نے کہاہے کہ خواتین کو باختیار بنانے کے لیے ان کی مالی شمولیت ضروری ہے، خواتین مالی طور پر مستحکم ہوں گی تو ان کا استحصال نہیں کیا جا سکے گا، خواتین کو بااختیار بنانے کے لیے احساس پروگرام اپنا کردار ادا کر رہا ہے۔

 ان خیالات کااظہارانہوں نے جمعہ کویہاں ایوان صدرمیں سٹیٹ بینک آف پاکستان کی جانب سے مالی شمولیت (فنانشل انکلوژن) میں خواتین کی شرکت میں اضافہ کیلئے “مساوی بینکنگ پالیسی” کی تقریب رونمائی سے خطاب کرتے ہوئے کیا۔ صدرمملکت نے کہاکہ خواتین کو مالی طور پرمضبوط بنائے بغیر انہیں بااختیا ر نہیں بنایا جا سکتا، دنیاکی تاریخ میں اسلام نے پہلی بارخواتین کووراثت کا حق دیکر انہیں بااختیاربنایا اورسورة نساءمیں خواتین کی وراثت اورحقوق کا تعین کردیا گیا۔ انگلینڈمیں بیسویں صدی تک خواتین کووراثتی اورمالیاتی حقوق نہیں ملے تھے۔

تقریب میں صدرمملکت کی اہلیہ ثمینہ علوی، گورنرسٹیٹ بینک ڈاکٹررضا باقر، وفاقی وزرا، ڈپٹی گورنرسٹیٹ بینک ڈاکٹرسیماکامل ، مختلف بینکوں کے سربراہان اورسی ای اوز، ارکان پارلیمان اوربینکوں ومالیاتی اداروں کے عہدیداروں نے شرکت کی۔