لاہور، 26ستمبر(اے پی پی): صدر آزاد کشمیر بیرسٹر سلطان محمود اور گورنر پنجاب چوہدری محمدسرور نے خطے میں امن کیلئے مسئلہ کشمیر کے حل کو لازمی قرار دیتے ہوئے کہا ہے کہ وزیر اعظم عمران خان حقیقی معنوں میں کشمیریوں کے سفیر بن کر انکا مقدمہ لڑ ررہے ہیں۔ دونوں شخصیات کے مابین ہونے والی ملاقات میں خیر سگالی کے جذبات کا اظہار اور باہمی دلچسپی کے امور پر گفتگو کی گئی۔
گورنر پنجاب نے کہا کہ بھارت سفارتی سطح پر دنیا میں تنہا اور بے نقاب ہوچکا ہے، ہم کشمیریوں کیساتھ کھڑے ہیں۔ انہوں نے کہا کہ کشمیری عوام جرات کیساتھ اپنی آزادی کی جدوجہد کر رہے ہیں، انشا اللہ وہ کامیاب ہونگے،نر یندر مودی اور بھارتی افواج کشمیر میں دنیا کی سب سے بڑی دہشت گردی کر رہا ہےاورجب تک مسئلہ کشمیر حل نہیں ہوگا خطے میں امن کے قیام کا خواب پورا نہیں ہوسکتا۔
صدر آزاد کشمیر نے کہا کہ بندوق اور گولی کی طاقت سے بھارت کشمیریوں کی آواز کو کسی صورت دبا نہیں سکتا، بھارت کشمیر میں انسانی حقوق کا قتل عام کر رہا ہے، دنیا کو بھارتی مظالم کا فوری اور سخت نوٹس لینا چاہیے۔انہوں نے کہا کہ وزیر اعظم عمران خان کی قیادت میں ہم آزادکشمیر کو مضبوط اور خوشحال بنائیں گے۔ ان کا کہنا تھا کہ پاکستان کے موجودہ کوششوں کی وجہ سے کشمیر یوں کی آواز آج دنیا کے کونے کونے میں پہنچ رہی ہے۔
