ملتان، 09 ستمبر (اے پی پی ):کمشنر ارشاد احمد نے ڈپٹی کمشنر عامر کریم خاں کو ویسٹ منیجمنٹ کمپنی کی کارکردگی کی ازخود نگرانی کرنے کی ہدایات جاری کردی ہیں اور ویسٹ منیجمنٹ کمپنی کو ایک ہفتے میں کوڑا کرکٹ کے ڈھیر اور ملبہ جات کی صفائی کا ٹاسک دے دیا گیا ہے۔
کمشنر ارشاد احمد اور ڈپٹی کمشنر عامر کریم خاں کو ویسٹ منیجمنٹ کمپنی انتظامیہ کی طرف سے بریفنگ دی گئی جبکہ منیجنگ ڈائریکٹر فخرالسلام ڈوگر نے کمپنی کے معاملات پر بھی بریفننگ دی۔
کمشنر نے کہا کہ کمپنی محدود وسائل میں شہری یونین کونسلز میں بہتر صفائی کررہی ہے ، افرادی قوت اور مشینری کی کمی پوری کرکے کارکردگی میں مزید اضافہ کیا جائے۔انہوں نے کہا کہ ویسٹ منیجمنٹ کمپنی کا دائرہ کار نواحی علاقوں تک بھی بڑھایا جائے گا ، اندرون شہر سمیت گنجان آباد علاقوں میں خصوصی سکواڈ تشکیل دیا جائے۔
ڈپٹی کمشنر نے کہا کہ جدید مشینری کی خریداری کیلئے پروکیورمنٹ کا فوری آغاز کیا جائے۔انہوں نے کہا کہ کمپنی میں کرپشن اور بوگس حاضریوں کا کلچر دفن کرینگے۔
منیجنگ ڈائریکٹر فخرالسلام ڈوگر نے کہا کہ مشینری اور عملہ صفائی کی کمی پوری کرنے کیلئے بورڈ نے منظوری دے دی ہے اور شہری یونین کونسلز میں صفائی کے مثالی انتظامات کئے گئے ہیں۔
