پشاور،22 ستمبر(اے پی پی): وزیراعلیٰ خیبرپختونخوا محمود خان نے بدھ کے روز حیات آباد پولیس اسٹیشن کا دورہ کیا جہاں اُنہوں نے ” آسان انصاف مرکز” کا باضابطہ افتتاح کیا۔ ” آسان انصاف مراکز” پروگرام کے پہلے مرحلے کے تحت صوبائی دارلحکومت پشاور کے مزید چار تھانوں، یونیورسٹی ٹاﺅن، فقیر آباد ، بڈھ بیر اور چمکنی کو بھی ” آسان انصاف مراکز” میں تبدیل کیا جائے گاجبکہ دوسرے مرحلے میں پشاور کے دیگر 12تھانوں کو بھی آسان انصاف مراکز میں تبدیل کیا جائے گا جس کے بعد پروگرام کو صوبے کے دیگر اضلاع بشمول ضم اضلاعتک توسیع دی جائے گی ۔ تھانوں کو آسان انصاف مراکز میں تبدیل کرنے کا مقصد روایتی تھانہ کلچر اور ماحول کو تبدیل کرنا، تھانوں میں آنے والے سائلین کو بہتر خدمات کی فراہمی کو یقینی بنانا، پولیس تک شہریوں کی رسائی کو آسان بنانا اور عوام دوست پولیسنگ کو فروغ دینا ہے ۔ آسان انصاف مراکزمیں جدید طرز کے رپورٹنگ روم، وزٹرز مینجمنٹ سسٹم ، کیو مینجمنٹ سسٹم ، کمپلینٹ مینجمنٹ سسٹم اور ریکارڈ مینجمنٹ سسٹم قائم ہوں گے ۔ اسی طرح ان مراکز میں ریکارڈ رکھنے، بہتر خدمات کی ترسیل اور موثر پولیسنگ کیلئے جدید سافٹ ویئر متعارف کرائے جائیں گے ۔ خواتین، خواجہ سراﺅں ، بچوں اور بزرگ شہریوں کیلئے الگ ڈیسکس قائم ہوں گے اور سی سی ٹی وی کیمروں کے ذریعے تھانے کی تمام سرگرمیوں کی براہ راست مانیٹرنگ کی جائے گی ۔
وزیراعلیٰ نے آسان انصاف مرکز کے مختلف شعبوں کا بھی تفصیلی معائنہ کیا ۔ وزیراعلیٰ نے روایتی تھانہ کلچر کو تبدیل کرکے اسے عوام دوست بنانے کیلئے پولیس حکام کے اقدامات کی تعریف کی اور کہا کہ صوبائی حکومت جدید عصری تقاضوں کے مطابق پولیس کو مستحکم بنارہی ہے ، پولیس کی استعداد کار کو بڑھانے اور تھانوں کے جملہ اُمور میں شفافیت کو یقینی بنانے کیلئے انفارمیشن ٹیکنالوجی کا موثر استعمال عمل میں لارہی ہے ۔
صوبائی وزیر تیمور سلیم جھگڑا، وزیراعلیٰ کے معاون خصوصی کامران بنگش، ڈپٹی اسپیکر صوبائی اسمبلی محمودجان، چیف سیکرٹری ڈاکٹر کاظم نیاز، انسپکٹر جنرل پولیس معظم جاہ انصاری اور دیگر متعلقہ حکام بھی اس موقع پر موجود تھے ۔
